Aktual / Manşet
268
6.07.2022, 14:38
Tahir Süleymanov: “Stuxlik komandasının son akkordları idi, bitib artıq” - AÇIQLAMA
Ötən həftə yola saldığımız mövsümdə özünü yaxşı tərəfdən göstərən hakim və hakim köməkçisinə AFFA-nın təşkilatçılığı ilə "Tofiq Bəhramov mükafatı" təqdim olundu.
Söhbət Elçin Məsiyevlə Namik Hüseynovdan gedir. AFFA-nın təşkilatçılığı, PFL prezidenti, premyer-liqa komandalarının baş məşqçiləri və kapitanlarının səsverməsinin yekunu ilə bağlı Tahir Süleymanovun fikirlərini öyrəndik:
“Öncə qeyd edim ki, "Tofiq Bəhramov mükafat"nın təsis olunması yaxşı haldı. Ümumiyyətlə, futbolda təbliğat, maarifləndirmə mühüm rol oynayır. Pərakəndəlik var, nominasiyalar üzrə mükafatlandırma, seçimlər daha geniş aparılmalı, təqdimatlar yüksək səviyyədə təşkil edilməlidi. Ənənələr var, “Futbol+” "Ən yaxşı futbolçu"nu illərdi seçir, başqa nominasiyalar üzrə sorğular keçirilir. Mərhum Elnur Əşrəfoğlu və Altay Əliyev Az.TV-də çalışdıqları zaman futbol mövsümünün sonunda ən yaxşı hakimləri seçirdilər, verilişlərdə bu sahəyə diqqət yetirilirdi və seçimlər çox müsbət qarşılanırdı. Bütün bunlar təşkilati dəstək olaraq AFFA tərəfindən rəsmi təqvimə salınmalı, təkmilləşdirilməli, sponsorlar cəlb edilməli, ənənələrin qorunması şərtilə futbol ictimaiyyəti qarşısında daha geniş tərkibdə təqdim olunmalıdı. Birlik olan yerdə işin keyfiyyəti, mahiyyəti də artır, məşqçi, futbolçu və hakimlərdə əlavə stimul, təbii rəqabət yaranır. Seçimlər, təhlillər apararaq ildən-ilə yeniliklər edilməlidi. Hakimlik spesifik sahədi, psixoloji cəhətdən daha həssas yanaşma tələb edir. Fərqli fikirlər səslənib, hər biri hörmətə layiqdi. "Sabah" neytrallığını qoruyub, səsvermədə iştirak etməyib. Bununla yanaşı, bu, mövsüm ərzində Stuxlik "hakimiyyətinin" komandalara qarşı haqsızlığına mədəni etirazı kimi də qəbul oluna bilər. Artıq avstriyalı yoxdu, hakimlik sahəsində yeni mərhələ başlamalıdı və federasiya-komitə-klublar-ictimaiyyət arasında peşəkarlığa, obyektivliyə söykənən səmimi münasibət qurulmalı, qarşılıqlı inam təmin edilməlidi. AFFA-ya təkliflərimdən birinin hakim nominasiyasında seçimlərin daha geniş tərkibdə təşkili, mövsüm ərzində çempionatı işıqlandıran media orqanlarının, jurnalistlərin, bu sahədə təcrübəli mütəxəssislərin səsvermədə iştirakının təmin olunması idi. Eyni zamanda, perspektivli, ən yaxşı gənc hakimin seçilməsi və başqa dahi hakimimiz - Eldar Əzimzadənin adına da mükafatın təsis olunmasını təklif etmişəm. Məşqçi, futbolçu seçimləri yanaşma baxımından nisbətən daha rahatdı. Baş məşqçi və kapitanların referilərin seçimi ilə bağlı fikirləri geniş əks-səda doğura bilər. Hakim və komandalar yenidən meydanda qarşılaşacaqlar. Referilərin, ümumilikdə hakimlər briqadasının haqlı qərarları belə psixoloji olaraq "səni seçməmişik" düşüncəsi ilə inamsızlıq yarada, fanatlar arasında müzakirələrə səbəb ola, fəsadlar törədə bilər. Hakim də insandı, onun da oyunlara yanaşmasında psixoloji cəhətdən mənfi-müsbət iz buraxa bilər. Ona görə mövsümün qaliblərinin müəyyənləşdirilməsində indiki durum təhlil olunmalı, seçim qaydaları yenidən müzakirə edilməli, təkmilləşdirilməli, daha geniş, futbol ictimaiyyətinin, jurnalistlərin iştirakı ilə keçirilməlidi. Bu şəfaflığı böyük ölçüdə təmin edər, obyektivliyi qoruyar, kənar müzakirələrə yol açmaz. Bu mövsüm kimlərsə səsvermədə iştirak edib, kimlərsə yox. Əsasnaməyə uyğun əsasən baş məşqçi və kapitanların iştirakı ilə seçimlər edilib. Stuxlik komandasının son akkordları idi, bitib artıq. Futbolda, hakimlikdə çox problem, strateji cəhətdən daha vacib, taleyüklü məsələlər var. Futbolda bütün sektorlar üzrə ciddi islahatlar aparılmalı, doğru kadr seçimi edilməlidi. Belədə yuxarıda qeyd olunanlar da müsbət həllini tapar”.
ABDULLA İSMAYILOĞLU
