Bildiyiniz kimi, "Qarabağ"ın təsisçisi Adil Nadirovun oğlu Sənan bəy ona məxsus səhmləri satışa çıxarıb.

Bu məsələ gündən-günə qəlizləşir. Sənan bəy ona məxsus payı satmaq istəyir, “Qarabağ” isə qiymətin baha olduğunu deyir. Görəsən, Azərbaycanda səhmlərin satılması necə tənzimlənir? “Qarabağ”ın iddiası doğrudu? Sənan Nadirov ona məxsus payı həddən artıq baha satır? Bu istiqamətdə suallarımız çoxdu. Məsələyə aydınlıq gətirmək üçün iqtisadçı ekspert Natiq Cəfərli ilə əlaqə saxladıq:

“Buna izah vermək çox çətindi. Klubun dəyəri olmalıdı. Yəni səhmlərin 100 faizinin qiymətinin nə qədər olduğunu bilməliyik. Xarici mediada məlumatlar çıxır ki, “Mançester Yunayted”, “Liverpul”, “Mançester Siti”, “Liverpul” və başqa klubların dəyəri filan qədərdi. Bizdə isə belə bir şey yoxdu. Olsa da, rəsmən açıqlamırlar. Həmin dəyər nə qədərdisə, onun 0,005 faizini hesablamaq lazımdı. Bilmirik axı klubun qiymətini. Bizdə səhm bazarı yoxdu, hissələr birjada satılmır, bu səbəbdən də qiymət bilinmir. Klub rəhbərliyi formal səhmlərinin qiyməti ilə bağlı hansısa açıqlama versə, hissələrin sayı ilə bağlı məlumatımız olsa, bunu dəyərə vurub hansısa məbləğ ortaya çıxarardıq. Məsələn, səhmin qiyməti 10 manatdı və 1 milyon da hissəsi var. Onda klubun dəyərini hesablayardıq. Ordan da 0,005 faizin qiymətini tapmaq asan olardı. Bizdə birja və belə şeylərin bazar tərəfindən tənzimlənməsi mümkün olmadığına görə qiymət qoymaq da asan deyil. Qısaca, klubun dəyərini öyrənə bilsək, onun 0,005 faizini hesablamaq asan məsələdi. Qalan məsələyə gəlincə, Sənan bəy öz hissəsini sata bilər. Burda alıcı ilə satıcı arasında anlaşma olmalıdı. Bu, dövlət tərəfindən tənzimlənən proses deyil. Bunu səhm bazarı olsaydı, ora tənzimləməliydi. Əlbəttə, belə bir qiymət təklif edə bilər. Lakin bu, real olmaya da bilər”.

İLKİN SULTANLI