"Qarabağ" rəsmisi səhmlərin 300 minə satılmasına etiraz etdi
Bildiyiniz kimi "Qarabağ"ın təsisçi Adil Nadirovun oğlu Sənan bəy ona məxsus səhmləri satışa çıxarıb.
"Futbol+"ə müsahibə verən adı çəkilən şəxs Ağdam təmsilçisində olan payına 300 min manat qiymət qoyub. Görəsən, səhmlərin neçə faizi Sənan bəyə məxsusdu? Ümumiyyətlə, "Azərsun Holdinq" nə üçün bu məsələni özü həll etmir? "Qarabağ"ın səhmlərin satılmasına münasibəti necədi? Suallarımızı klubun mətbuat katibi Gündüz Abbaszadəyə ünvanladıq. Ağdam təmsilçisinin rəsmisi məsələyə belə aydınlıq gətirdi: "Adil müəllimə Allahdan rəhmət diləyirəm. "Qarabağ"ın ayaqda qalması üçün əziyyəti çox olub. Klubumuzun bu yerlərə gəlməsində şübhəsiz ki, Adil bəyin də çox böyük payı var. Ən çətin vəziyyətində "Qarabağ"ı sahiblənib. Bəli, Adil Nadirovun oğlu Sənan bəy öz səhmlərini satmaq istəyir. Bu, onun tam haqqıdı. Atasının varislərindən biri kimi bunu edə bilər. Hazırda bu məsələ gündəmdədi. Hər kəs tərəfindən müzakirə olunur. Təəssüf edici məqam bundadı ki, heç kim Sənan bəyə düşən payın neçə faiz olduğunu soruşmur. Heç kim də məhz bu məsələni müzakirə etmir. Sizə təşəkkür edirəm ki, bu məsələni gündəmə gətirdiz. Nəzərinizə çatdırım ki, Adil bəyin səhmləri iki qardaş arasında bölünüb. Adil bəyin səhmi isə 0,01 faiz idi. İndi bu hissə də iki yerə bölünüb. Yəni, Sənan bəyin payı burda 0.005-di. İndi siz özünüz təsəvvür edin ki, bu səhmlərin real dəyəri nə qədərdi? Bəli, bildiyim qədəri ilə bizə də səhmlərin alınması təklif olunub. Amma real qiymət məsələsi var. Gəlin, etiraf edək ki, bu gün "Qarabağ" Futbol Klubu "Azərsun Holdinq"in hesabına ayaqda qalır. Düzdü, klubumuz avrokuboklarda iştirak edir, burda gəlir əldə edir. Amma bu, mənfəət deyil. Yəni qazanc əldə etməyən klubun səhmlərinin Sənan bəyə dediyi qiymətə olması heç də real deyil. Bizim məsələyə olan münasibətimiz belədi. Sənan bəyə uğurlar arzu edirəm. Amma reallığı da nəzərə almaq lazımdı. Adil müəllim “Qarabağ”ı sevən biri olub. Azərsun rəhbərliyi komandaya rəhbərlik etməyə başlayanda onun heç bir istəyi olmayıb. “Təki, komanda yaxşı olsun, “Qarabağ” üçün uğurlu olsun” deyə düşünüb".
Digər xəbərlər
