“Mançester Siti”nin və Almaniya yığmasının türkəsilli yarımmüdafiəçisi İlkay Gündoğan doğma məmləkəti Balıkəsirdə özünə toy etməyə hazırlaşır.

Məşhur futbolçu həyatını Sara Afaui ilə birləşdirəcək. Artıq iyulun 3-də baş tutacaq toyun dəvətnamələri də paylanılıb.

Əslində İlkayla Saranın toyu mayın 17-də Kopenhagen bələdiyyəsində baş tutmuşdu. Həmin gün az sayda qonağınn iştirakı ilə nigah mərasimi keçirilmişdi. Uşaqlıqdan “Qalatasaray” azarkeşi olan bu futbolçunun məhz 17 may tarixini və məhz Kopenhageni seçməsi təsadüfi deyildi. 2000-ci il mayın 17-də, bilindiyi kimi, “Qalatsaray” Kopenhagendə “Arsenal”ı məğlub edərək UEFA kubokunu qazanmışdı. Amma həmin mərasimdə futbolçunun çox az sayda qohumu iştirak etmişdi. Bu üzdən İlkay bu dəfə doğma məmləkəti olan Balıkəsirin Dursunbəy rayonunda yerli adət-ənənələrə uyğun toy etməyi planlaşdırır. Toy Dursunbəyin mərkəzindən təxminən 3 km məsafədə yerləşən və o ərazidə yetərincə populyar olan “Asya Kır Bahçesi” sarayında baş tutacaq. Dəvətnamələr İlkayın rayonda yaşayan qohum-əqrəbasına, eləcə də tanışlarına paylanılıb. Müxtəlif sahələrdən də bir çox ünlü ismin qatılacaği gözlənilən mərasimdə gündüz saatlarında qonaqlara yemək veriləcəksə, axşam saatlarında əyləncə olacaq. Rayonda toya hazırlıq tam sürətlə davam edir. Toy günü sarayın həyətinə süni ot örtüyü döşənəcəyi gözlənilir. Hazırda Bodrumda istirahətdə olan cütlük həftəsonu Dursunbəyə yollanacaq.

Qeyd edək ki, Sara Arfaui mərakeşəsilli italiyalı aparıcıdı. 27 yaşlı bu xanım daha öncə model kimi çalışıb. Onlar keçən il ÇL-in finalı ərəfəsində tanış olublar.