İlkay Gündoğan Məsut Özili geridə qoydu

Premyer-liqanın 31-ci turu çərçivəsində ''Mançester Siti'' səfərdə ''Bernli''ni 2:0 hesabı ilə yenərək liderliyini davam etdirdi.

Bu görüşdə bir sıra maraqlı göstəricilər qeydə alındı. Hesabı açan İlkay Gündoğan premyer-liqada ümumilikdə 34-cü qolunu vurdu. Bununla da İlkay Məsut Özili (33 qol) geridə qoyaraq premyer-liqa tarixində ən çox qol vuran almaniyalı futbolçuya çevrildi. Bu siyahıda 3-cü pillədə ''Tottenhem''də iki mövsümə 29 qol vurmuş Yürgen Klinsmann qərarlaşıb. ''Siti'' bu mövsüm premyer-liqada hesabda öndə olduğu 23-cü qarşılaşmadan da xal itirmədən ayrıldı. Qeyd edək ki, bu turnirdə indiyə qədər bir mövsümdə hesabda öndə olduğu matçların hamısından qələbəylə ayrılan kollektiv olmayıb. Bundan başqa Aymerik Laport premyer-liqada yubiley - 100-cü oyununu keçirərək xal baxımından rekord qırdı. Belə ki, ispaniyalı müdafiəçi ''şəhərlilər''in heyətində bu 100 oyundan 82 qələbə, 8 bərabərlik, 10 məğlubiyyətlə ayrılaraq 254 xal toplayıb. Premyer-liqada ilk 100 oyunda komandasıbundan daha çox xal toplayan oyunçu olmayıb. Əvvəlki rekord Laportun komanda yoldaşı Ederson və ''Çelsi''li Didye Droqbaya (hər ikisi 246) məxsus idi.