“Nautiko”nun idman direktoru “Qarabağ” rəsmisini təəccübləndirib - AÇIQLAMA
Günə qeyri-adi xəbərlə başladıq. Belə ki, “Nautiko” Rhaldneyin transferi ilə bağlı “Qarabağ”ı aldatmağa çalışıb. Bu məlumatı Braziliya mətbuatı yayıb.
İddiaya görə, Pernambuku təmsilçisi depozit üçün klubun yox, direktorlardan birinin hesab nömrəsini göndərib. Bundan sonra isə anlaşma pozulub.
Məsələ ilə bağlı ölkə mətbuatına açıqlama verən "Nautiko"nun idman direktoru Roberto Selva isə bu məsələdə "Qarabağ"ı günahlandırıb.
Görəsən, hadisə necə cərəyan edib? “Qarabağ” məsələdən necə duyuq düşüb? Başverənlərə aydınlıq gətirməsi üçün Ağdam təmsilçisinin baş meneceri Asif Əsgərovla əlaqə saxladıq. Klub rəsmisi məsələ ilə bağlı bunları söylədi:
“Adı çəkilən futbolçu bizim geniş siyahımızda olub. Əlbəttə ki, oyunçunun müqaviləsi varsa, onun klubu ilə maliyyə məsələləriylə bağlı danışıq aparmaq lazımdı. Bu səbəbdən də “Nautiko”dan futbolçunun maliyyə şərtlərini soruşmuşuq. Lakin biz klublararası müqavilə məqamına gedib çatmamışıq. Qalan məsələlər isə detallardı. Başa düşmürəm ki, adı çəkilən klub nə üçün belə açıqlamalar verir? Təbii ki, bu onlar üçün mənfi imic formalaşdırır. Şəxsi hesab vermək nədi? Nə üçün belə şeyləri mediaya açıqlayırlar? Bunu başa düşə bilmirəm. Bəlkə də onların mediası da klubdan futbolçunun transferinin baş tutmamasının səbəbini tez-tez soruşur. Yenə deyirəm, bir oyunçunu transfer etmək istəyirsənsə, qarşı tərəfə sorğunun göndərilməsi normal haldı. Təbii ki, burda futbolçunun maliyyə şərtlərini də öyrənirsən. Bizim də adı çəkilən klubun oyunçunu neçəyə satdığını öyrənməyimiz normaldı. Amma bu o demək deyil ki, “Qarabağ” həmin şəxsi transfer edir və ya düşərgəsinə gətirir. Əvvəlcə klubla razılaşmalı, daha sonra futbolçu ilə maaş məsələlərində anlaşmalıydıq. Roberto Selvanın belə detallı açıqlama verməsi mənə təəccüblü gəldi”.
İLKİN SULTANLI
Digər xəbərlər
