Bir qədər gec olsa da, nəhayət ki, “Neftçi”yə yeni baş məşqçi təyin olundu.

Növbəti mövsümdən komandanı rumıniyalı Laurentsiu Regekampf çalışdıracaq. Onun gəlişindən sonra iki legioner transferi də gerçəkləşdirən "ağ-qaralar" Konfrans Liqasının hazırlığına da start verib.

Maraqlıdı, “Neftçi” azarkeşləri növbəti mövsümdə komandadan nə gözləyir? Yeni baş məşqçi onlarda necə təəssürat yaradıb? Bu suallarla “Forza Neftçi”nin üzvü Aqil Məmmədquliyevlə əlaqə saxladıq:

“Məşqçi seçiminin gec olması məni çox narahat edirdi. Amma ümid edirəm ki, bu məşqçi çatdırıb işini düzgün görəcək. Onun iş prinsipi barədə Rumıniyada çalışan fanklubun sabiq üzvlərindən olan dostumuz sayəsində çox maraqlanmışıq. Öyrəndiyimiz məlumatlar bizi çox ümidləndirir. Dünən azarkeşlər arasında iclas keçirdik. Demək olar ki, hamı çox ümidlidi və məşqçiyə çox güvənir. Məşqçi seçimi ilə bağlı qərar, hesab edirik ki, çox doğru qərardı. Düzdü, onun özü ilə hələ görüşə bilməmişik, amma fikrimiz var ki, görüş təşkil edək. Son illərdə mənim komandadan bu qədər əmin olduğum yadıma gəlmir. Bu il “Neftçi”yə inamım çoxdu. Axır ki, ciddi iş görülür. Baş məşqçi özü-özlüyündə o əminliyi yaradır, amma onu da gətirən beyinlər var. Sözüm nə qədər düz çıxar, deyə bilmərəm, amma hərənin öz fikri var deyə bildirirəm ki, prezident Kamran Quliyev də öz işində peşəkarlaşıb. Eyni zamanda, Zaur Əzizovun da komandaya gətirilməsi irliyə doğru atılan çox böyük addım oldu. Mən Əzizova çox inanırdım. Ümid edirdim ki, inamımı sarsıtmayacaq. Hələ də o fikirdəyəm. Hətta inandığımdan artığını edəcəyinə əminəm. Düzdü, çatışmazlıqlar da var, amma xeyli yeni işlər görülüb. Komandaya güvənirik, amma kaş əvvəl olduğu kimi inamımız yarıda qırılmasın. Ümid edirəm ki, “Neftçi” Konfrans Liqasında böyük pullar qazanacaq (gülür). Çünki komandanın yaxşı qazanması növbəti mövsümlər üçün zəmindi. 20-25 gün öncə, çox gərgin idik. Son bir həftədə isə çox dəyişiklik olub, iş gedir. Ona görə də hər birinə ayrı-ayrılıqda uğurlar arzulayıram”.

Aqil Məmmədquliyev “Neftçi”nin yeni transferlərindən də danışdı:

“Yeni transferlərin hamısına "xoş gəldin" deyirik. Onların özləri haqda ətraflı məlumatımız yoxdu. Sadəcə, videolara baxmışıq. Oyun baxımından dəqiq bir söz deyə bilməyəcəm. Amma bilirik ki, xarakter baxımından güvəniləcək futbolçulardı. Çempionatda “Neftçi”nin heyətinə artıqlaması ilə güc qatacaqlar. Qitəmiqyaslı yarışlarda isə nə qədər faydalı olacaqlarını deyə bilmərəm”.

ŞAİR ABDULLA