Laurentsiu Regekampfın “Neftçi”yə baş məşqçi təyin olunmasını futbol ictimaiyyəti heç də birmənalı qarşılamadı.

Bəziləri 46 yaşlı mütəxəssisin “ağ-qaralar”da uğur qazanacağını, komandanı daha yüksək yerlərə daşıya biləcəyini düşünürsə, bu fikirlə razılaşmayan müəyyən qism ölkənin ən köklü klubunun “sükanı arxasına” daha tanınmış mütəxəssisin dəvət olunacağını gözlədiyini bildirir. Bir sözlə, istər sosial şəbəkələrdə, istərsə də müxtəlif mətbu orqanlarda bununla bağlı fərqli fikilərə rast gəlmək mümkündü. “Futbol+” olaraq, biz də futbol təsərrüfatının müxtəlif yönlərini təmsil edən şəxslərin fikirlərini öyrənməyi lazım bildik. Bu səbəbdən jurnalist, agent və futbol veteranı seçdik.

Ceyhun Əliyev (sport24.az saytının baş redaktoru): “Bəzən belə də olur. Futbol ictimaiyyətinə sağı göstərib, solu vurdu "ağ-qaralar". Sadəcə, Regekampfın həmin arzulanan şəxs olub-olmaması ciddi sualdı. Rumıniyalının namizədliyi var idisə də, çox arxa sıralarda idi. Deməli, klub rəhbərliyi ona “Neftçi”ni yüksək hədəflərə çatdıra biləcək mütəxəssis gözü ilə baxmayıb. Belədə pozitiv proqnoz vermək ağır söhbətdi. O qrup insanlarla da razıyam ki, 46 yaşlı mütəxəssisi dərhal tənqid etməməyə çağırırlar. Haqlıdılar, hələ ortada “nə ət var, nə də pişik”. Lakin bu sahədə külüng çalmış biri kimi “Neftçi” rəhbərliyinə bir tövsiyəm var: indidən baş məşqçi axtarsınlar. Ki, sonradan tələsik qərar vermək məcburiyyətində qalmasınlar”.

Adrian Nyaqa (“Neftçi”nin rumıniyalı sabiq legioneri): “Həmyerlimin sabiq klubumun baş məşqçisi təyin olunması xəbərini mən də bu gün Rumıniya mətbuatından oxudum. Səhv etmirəmsə, Azərbaycanda çalışan sonuncu rımın mütəxəssis Mirça Rednik olub. Onu da bilirəm ki, Rednik “Xəzər Lənkəran” camiəsində çox sevilən məşqçi idi. O ki qaldı Regekampfa, çox yaxşı məşqçidi. Əla xarakterə sahibdi. Ümid edirəm ki, “Neftçi”də uğur qazanacaq. İstər Rumıniyada, istərsə də xaricdə çalışdırdığı komandalarla yüksək zirvələri fəth etməyi bacaran, daim ambisiyalı, əldə etdiyi ilə kifayətlənməyən, enerjili mütəxəssisdi. Bildiyimə görə, ona başqa klublardan da təkliflər olub. Ancaq növbəti dəfə özünü ölkə xaricində sınamağa qərar verib. Çalışdırdığı komanda Asiya Çempionlar Liqasının finalında oynayıbsa, o məşqçiyə orta səviyyəli və yaxud sadəcə, “yaxşı məşqçi” demək düz olmaz. Həmişə üzərində işləməyi sevən, yeniliklərə can atan mütəxəssis kimi inanıram ki, Laurentsiu premyer-liqada “Qarabağ”ın hökmranlığına son qoyub “Neftçi”ni çempionluğa daşıyacaq. İnsan kimi də xoş sözlərə layiqdi. Çox fərqli məşq metodu var. Rumıniyada çalışdığı bütün klublarda futbolçular onu çox istəyiblər. Çünki futbolçularla dil tapmağı bacarır. Onun çalışdırdığı komandalar hücum futbolu sərgiləyir və bu üzdən çox qol vururlar. Fikrimcə, “Neftçi” çox yaxşı seçim edib”.

Vaqif Heydərli (futbol agenti): “Fikrimcə, yaxşı seçimdi. Regekampf istər vətənində, istərsə də ərəb ölkələrində yetərincə iş təcrübəsinə malikdi və çalışdırdığı klublarla müəyyən uğura imza atıb. Mütəxəssis modern Avropa futbolundan xəbərdardı. Regekampfın üstünlüyü ondadı ki, istər təcrübəli futbolçuların yer aldığı “Styaua”da, istər az məvacibə oynayan, daha çox gənclərin çıxış etdiyi “Universitetya Krayova” da, istərsə də zəngin büdcəyə malik ərəb klublarında futbolçularla dil tapmağı bacarıb, futbol fəlsəfəsini onlara aşılaya bilib. Və belədə nəticə də özünü çox gözlətmir. Bəli, bu gün üçün biz ancaq kənardan baxıb subyektiv fikirlərimiz söyləyə bilərik. Ancaq sadaladığım məqamları nəzərə aldıqda rumıniyalı mütəxəssisin Azərbaycanda uğursuz olmaq ehtimalı azdı. İnanıram ki, “Neftçi” yeni çalışdırıcı ilə zirvələrə yüksələcək”.

RƏŞAD