“Biz istəyimizə çatdıq, Samir Abasov yox”
“Neftçi”nin Müşahidə Şurasının bir neçə gün əvvəl keçirilən iclasında önəmli qərarlar verildi.
Bunlardan ən əsası baş məşqçi Samir Abasovla yolların ayrılması oldu. 2020-ci ildən etibarən komandanı çalışdıran mütəxəssis ötən il “ağ-qaralar”a çempionluq da yaşadıb. Son oyunlarda azarkeşlərlə də müəyyən problemlər yaşayan Abasovun komandadan getməsi, yəqin ki, “Forza Neftçi” üzvlərinin də ürəyincə oldu. Etiraf etməliyik ki, müqavilə müddətinin uzadımamasının səbəblərindən biri də elə bu idi.
Müşahidə Şurasının iclasında qəbul olunan bu qərara azarkeşlərin münasibətini öyrəndik. “Forza Neftçi”nin üzvü Aqil Məmmədquliyev məsələ ilə bağlı bunları dedi:
“Mən, ümumiyyətlə, Müşahidə Şurasının özünə qarşıyam. Şəxsiyyətlərlə işim yoxdu. Faktiki heç nə həll etmirlər. O ki qaldı son toplantıda verilən qərarlara, düşünürəm ki, bir məşqçi olaraq Samir Abasovu itirməyimiz heç də xoş deyil. Onun “Neftçi”yə gəlməsini rəhbərlikdən xeyli öncə biz istəyirdik. Amma fikrimcə, bir insan kimi yol verdiyi nöqsanlara görə getməsi onun üçün də, bizim üçün də yaxşı oldu. Lakin hesab etmirəm ki, yalnız azarkeşlərə görə komandadan göndərildi. Düzdü, bunun da təsiri var idi. Onun son mövsümü titulsuz başa vurması da bu qərarın verilməsinə təsir etdi. Bu haqda çox danışmaq istəmirəm. Yəni biz istəyimizə çatdıq, Samir Abasov yox. Ona görə bu məsələdə çox dərinə getmək ucuzluq olardı”.
Qeyd edək ki, “Neftçi”nin yeni baş məşqçisinin əcnəbi olması gözlənilir. Namizədlər Viktor Qonçarenko ilə Yuri Vernidubdu. Maraqlıdı, azarkeşlər bu mütəxəssislərdən hansını komandaya layiq görür? Aqil Məmmədquliyevi eşidək:
“Bu çox ağır sualdı. Təbii ki, mən daha çox uğur qazana biləcək məşqçinin gəlməsini istəyirəm. Hansı Azərbaycan futboluna nisbətən bələddisə, o gəlsin. Amma hesab etmirəm ki, futbolumuzda baş verən proseslərdən xəbərdardılar”.
ŞAİR ABDULLA
Digər xəbərlər
