Yeni mövsümdən heyətinə legioner cəlb etməyə icazə verilən “Sumqayıt”da hələ ki səssizlikdi. Komanda üzvləri və məşqçilər korpusu istirahətə buraxılıb.

Klubun mətbuat katibi Rəşad Məmmədovdan aldığımız bilgiyə görə, “kimyaçılar” iyunun 25-də hazırlığın ilk mərhələsinə başlayacaq. Komanda doğma şəhərdə bir araya gələcək. Hazırda vətəni Belarusda olan baş məşqçi Aleksey Baqanın Sumqayıta dönüşü iyunun 24-nə planlaşdırılıb.

Təxminən iki həftə davam edəcək toplanışın ilk mərhələsindən sonra “gənclik şəhəri”nin təmsilçisi Türkiyəyə yollanacaq. Sumqayıtlılar qardaş ölkənin Bolu bölgəsini seçib. Komanda orda olduğu müddətdə üç yoxlama matçı keçirməyi planlaşdırır ki, hazırda sınaqçı-rəqiblərin axtarışı yönündə çalışmalar davam edir.

Bu yerdə onu da qeyd edək ki, “Sumqayıt”ın yeni mövsümdə əməkdaşlıq edəcəyi idman firması müəyyənləşib. “Kimyaçılar” son 3 ildə olduğu kimi, Almaniya şirkəti “Jako”nun istehsal etdiyi idman giyimlərindən yararlanacaq. Artılq klubla şirkət arasında yeni mövsüm üçün razılıq əldə olunub.

RƏŞAD