Yeni mövsümdən legioner transferinə icazə verilən “Sumqayıt”da hələ ki sakitlikdi.

Kluba yaxın mənbələrdən əldə etdiyimiz bilgiyə görə, “kimyaçılar”ın rəhbərliyi yeni “futbol ili” üçün büdcənin təsdiq olunmasını gözləyir. Bu məsələ həllini tapandan sonra “gənclik şəhəri”nin təmsilçisinin rəsmiləri maraq dairələrinə düşən futbolçularla danışıqlara başlayacaq. Mənbəmizin sözlərinə inansaq, belə oyunçuların sayı heç də az deyil.

Klub rəhbərliyi transfer məsələsində gözləmə mövqeyində olsa da, komandanın birinci mərhələ üçün təlim-məşq planı artıq hazırdı. Belə ki, “Sumqayıt” iyunun 26-da “Kapital Bank Arena”da bir araya gələcək. Kollektivin üzvləri tibbi müayinədən sonra məşqlərə başlayacaq. Toplanışın birinci məsrhələsinin sonunda isə yoxlama matçının keçirilməsi planlaşdırılır. Hələ rəqibin adı müəyyənləşməsə də, elita təmsilçilərindən biri olacağı dəqiqdi. İyulun 15-də Aleksey Baqanın çalışdırdığı komanda Türkiyəyə, daha dəqiq desək, Boluya yollanacaq. 12 günlük toplanış çərçivəsində sumqayıtlılar qardaş ölkədə üç yoxlama görüşü keçirəcək.

RƏŞAD