Cavid Hüseynov premyer-liqada baş məşqçi işləyə bilər? - AÇIQLAMA
Bu günlərdə ölkə futbolunun haqqında ən çox danışılan siması Cavid Hüseynovdu.
“Cəbrayıl”ın həm prezidenti, həm də baş məşqçisi olan şəxs Region Liqasının qalibi olandan sonra daha da məhşurlaşıb. Deyilənə görə, gənc mütəxəssis premyer-liqada çıxış edən “Şamaxı”nı çalışdıracaq.
Hamıya bəllidi ki, Cavid Hüseynov B lisenziyalı məşqçidi. Belə olan halda premyer-liqada komanda çalışdıra bilər? Məsələ ilə bağlı AFFA-da Məşqçilərin Maarifləndirmə şöbəsinin direktoru Aslan Kərimovla əlaqə saxladıq. Tanınmış mütəxəssis bunları söylədi:
“Bu xəbəri mən də görmüşəm. Saytlarda Cavidin “Şamaxı”ya getdiyi ilə bağlı məlumatlar gəzir. Allah yolunu açıq etsin. Hüquqi baxımdan isə vəziyyət fərqlidi. Heç A lisenziyalı məşqçi də premyer-liqada çalışa bilməz. Sadəcə, belə şeyləri klublar özləri tənzimləyir. PRO lisenziyalı məşqçinin adını əsas çalışdırıcı kimi göstərirlər. Lakin kimi təyin ediblərsə, həmin şəxs də qərar verir. Sənədləşmədə kimin PRO lisenziyası varsa, o, baş məşqçi olur. Bunu belə tənzimləmək mümkündü. Bu, o qədər də çətin məsələ deyil. PRO lisenziyası olanı yazırlar, sənədləşdirirlər. Burda deyə bilmərik ki, qərarı kim verib, komandanı kim formalaşdırıb? Cavabında deyəcəklər ki, baş məşqçi öhdəliyi verib başqasına. Qısaca, belə məsələləri dediyim kimi tənzimləyirlər. Sözsüz ki, Cavidin önündə böyük yol var. Əlbəttə, təcrübəyə ehtiyacı var. Düşünürəm ki, əməlli-başlı çətinliklərlə üzləşəcək. Amma bunun öhdəsindən gələcəyinə də əminəm. Çünki onun futbolçu təcrübəsi var. Ətrafına yığdığı insanlardan da çox şey asılı olacaq. Ümid edirəm ki, ətrafındakılar çatışmazlıqlar zamanı boşluğu doldura biləcək”.
Aslan Kərimov ölkə futbolunun ən böyük problemini dilə gətirdi. Görəsən, bu boşluğun yaranmasının səbəbi nədi? Burda günahkar kimdi? Federasiya rəsmisi sualımızı belə cavabladı:
“Əslində bu, boşluq deyil. Vəziyyət bir az fərqlidi. Bir qayda tətbiq olunub. Bu təkcə premyer-liqada belə deyil. UEFA lisenziya almaq istəyən klubların qarşısına şərt qoyur ki, sənin filan qədər PRO, A, B və ya C lisenziyalı məşqçin olmalıdı. Konkret sayı bilmirəm. Bu da ümumiləşdirilmiş qərardı. Bütün federasiyalar da buna uyğun hərəkət edir. Bəzən elə olur ki, məşqçi A lisenziyalıdı, amma PRO-nu oxuyur. Belə çalışdırıcını da götürməmək olmur. Ya da savadlı məşqçidi, amma hələ ki kursu bitirməyib. Belə olan halda dediyiniz boşluqlara yol verirlər”.
İLKİN SULTANLI
Digər xəbərlər
