Türkiyə yığmasının aparıcı müdafiəçilərindən olan Merih Dəmiral ilə ''Atalanta'' arasında imzalanan müqavilənin detalları məlum olub.

Xatırladaq ki, ötən mövsüm müqavilə ilə ''Yuventus''a məxsus olan 24 yaşlı futbolçu icarə əsasında ''Atalanta''nın şərəfini qorumuşdu. Mövsüm bitdikdən sonra Berqamo təmsilçisinin Merihi daimi əsasda transfer etmək istəmədiyi irəli sürülmüş və onun İngiltərəyə yollanacağı iddiası ortaya atılmışdı. Amma belə olmadı. ''Atalanta'' baş məşqçi Canpyero Qasperinin göstərişi ilə Dəmiralı daimi əsasda heyətinə qatıb. Beləliklə, ''Atalanta'' bu futbolçuya görə bəzi mənbələrdə qeyd olunduğu kimi 23 milyon avro yox, 20 milyon avro ödəyəcək. Müqavilənin müddəti ilə bağlı məlumat verilmir. Müqavilədə 2,5 milyon avroluq bonuslar da nəzərdə tutulub. Bundan başqa, ''Atalanta'' bu 20 milyon avronu ''Yuventus''a 4 dəfəyə ödəyəcək. Və nəhayət, Merih başqa kluba satılacağı və ya icarəyə göndəriləcəyi halda əldə olunan məbləğin 10 faizi də ''Yuve''yə çatacaq.

Qeyd edək ki, istedadlı futbolçu ötən mövsümü A seriyasında 8-ci pillədə başa vuran berqamoluların heyətində 42 rəsmi oyunda 2 qol, 3 məhsuldar ötürmə ilə fərqlənmiş, eyni zamanda 2 dəfə ayın oyunçusu (yanvar, mart) seçilmişdi. ''Yuventus''da isə Merih 2019-21-ci illərdə çıxış edib və 32 rəsmi oyunda 1 qol, 2 məhsuldar ötürmə ilə yadda qalıb.