İyunun 24-də “Cəbrayıl” UEFA Region Kubokunun ilkin seçmə mərhələsində Belarus “Kolos”u ilə üz-üzə gələcək.

Cavid Hüseynovun çalışdırdığı komanda 10 gündən artıqdı oyunun keçiriləcəyi Şamaxıda hazırlığa başlayıb. Dünən Cavid bəylə əlaqə saxlayıb, bəzi suallara cavab tapmağa çalışdıq.

- Əvvəlcə hazırlıq barədə məlumat verməyinizi istərdik. Komanda “Kolos”la oyuna hazırdı?
- Bildiyiniz kimi, iyunun 12-dən Şamaxı Olimpiya Kompleksində təlim-məşq toplanışına başlamışıq. Şükür Allaha, hazırlıq baxımından bu günə qədər hansısa çətinliklə üzləşməmişik. Uşaqlar da məşqlərdə özlərini yaxşı tərəfdən göstərməyə çalışırlar. Komandanın gündən-günə inkişaf etdiyini görürük. Komandanın, demək olar, yenidən formalaşdığını ötən dəfə sizə demişəm. Köhnə heyətdən kollektivdə 4-5 futbolçu qalıb.

- Kollektivdən söz düşmüşkən, ötən dəfə bizimlə söhbətdə heyətin 95 faizinin yenilərdən təşkil olunacağını bildirmişdiz. Onlar kimlərdi və hardan dəvət etmisiz?
- Geridə qalan mövsümdə Region Liqasında mübarizə aparan 5-6 komandadan oyunçular dəvət etmişik. Onların arasında “Xan Lənkəran”da, “Ağsu Siti”də, “Mübariz”də və “Ümid”də oynayanlar var. Bacardığımız qədər perspektivli, komandanın gücünə güc qatmağı bacaracaq futbolçuları dəvət etmişik. Komandanı yenidən qurmaq, komplektləşdirmək çox əziyyətli iş olsa da, bu addımı atmağa məcburuq. Yarışın reqlamenti belə tələb edirdi. Hələ ki hazırlıq prosesi istədiymiz formada davam edir. Düzdü, sıxıntılarımız da var. Hücum və yarımmüdafiədə seçim imkanımız geniş olsa da, müdafiəçilərimizin sayı azdı. Sifariş ərizəsini təqdim etmək üçün vaxtımız az olduğundan, istədiyimiz seleksiyanı gerçəkləşdirmək mümkün olmadı.

- Birinci qrupda üç komanda – “Basiani” (Gürcüstan), "Kaskelen" (Qazaxıstan) və "Tallin Zapoos" (Estoniya) yer alır. Yarışın reqlamentinə əsasən bu komandalar öz aralarında bir dəfə qarşılaşıb qrup birincisini müəyyənləşdirəcəklər. Sizin yer aldığınız ikinci qrupda isə “Cəbrayıl” və “Kolos”du ki, bu üzdən Belarus təmsilçisi ilə iki dəfə üz-üzə gəlmək məcburiyyətindəsiz. Sizcə, ilk pilləni tutmaq üçün hansı qrup daha münasibdi?
- Məncə, bir komanda ilə iki dəfə üz-üzə gəlmək üstünlükdü. İlk oyunda rəqibi daha yaxından tanımaq şansın olur. Ona bələd olandan sonra ikinci görüş üçün fərqli sistemdən, taktiki gedişdən istifadə etmək olar. Bir sözlə, növbəti mərhələyə yüksəlmək baxımından bizim qrup daha münasibdi.

- İlk oyun ərəfəsində Belarus komandası barədə hansı məlumata sahibsiz?
- Bəzi oyunlardan 2-3 dəqiqəlik videolarını izləmişik. Əlimizdə onların iştirakı ilə keçirilən hansısa matçın tam videoyazısı yoxdu. Fraqmentlərə baxmışıq ki, bu da rəqib barədə fikir formalaşdırmaq üçün yetərli sayıla bilməz. Ancaq bu yöndə axtarışımız davam edir. Oyun gününə qədər “Kolos”un hansısa görüşünün tam videosunu tapmağa çalışacağıq.

- İyunun 12-dən Şamaxıda təlim-məşq toplanışındasız. Toplanışın xərcini kim qarşılayır?
- Bütün xərcləri AFFA qarşılayır. Rayonun icra hakimiyyəti də əlindən gələn köməyi göstərməyə çalışır. Düzdü, müyyən sıxıntılarımız da var. 25-30 nəfərlik komandanın gündəlik xərcini qarşılamaq üçün yetərincə böyük vəsait tələb olunur. Komandanın direktoru, dostum və “Cəbrayıl”ın sponsoru Şahin Məmmədovun da böyük dəstəyini hiss edirik. Rayonun iş adamları da bizi yaddan çıxarmırlar, imkan daxilində komandaya yardım edirlər. Sıxıntımız, çətinliyimiz olsa da, əsas odu ki, işimizə doğru-dürüst yanaşırıq. Yaxşı başa düşürük ki, UEFA Region Kubokunda tək Cəbrayılı yox, Azərbaycanı təmsil edirik. Fikrimcə, sonluq yaxşı olacaq.

RƏŞAD