''Fənərbaxça''da baş məşqçi ilə bağlı qeyri-müəyyənliyə, nəhayət, son qoyuldu.

Bu barədə klubun rəsmi saytı məlumat yayıb. Portuqaliyalı mütəxəssislə 1 illik müqavilə imzalayıb. 67 yaşlı çalışdırıcı "sarı-lacivərtlilər"də illik 3 milyon avro maaş alacaq.

Srağagünsə iki önəmli olay yaşandı. Birincisi, ötən mövsümün ikinci dövrəsində komandanı uğurla çalışdıraraq ''Fənər''ə ÇL-ə vəsiqə qazandıran İsmayıl Kartal istanbullularla birdəfəlik vidalaşdı. İkincisi Əli Koçun 1 aya yaxındı danışıqlar apardığı Jorje Jezuş gecə saat 01.50-də İstanbula ayaq basdı. ''Fənər''in ayırdığı xüsusi təyyarə ilə İstanbula gələn ünlü mütəxəssisi klubun idarə heyətinin üzvü Səlahəttin Baki qarşıladı. Gec saatlarında gəlməsinə baxmayaraq, fanatlar məşqçini ''Sabiha Gökçən'' hava limanında böyük hay-küylə qarşıladılar. İstanbula oğlu və iki köməkçisi - Joao Deuş və Marsio Sampayo ilə birlikdə gələn 67 yaşlı mütəxəssis daha sonra helikopterə minərək otelə yollandı. Jezuşun digər 5 köməkçisinin önümüzdəki günlərdə İstanbula gələcəyi gözlənilir.

Dünən isə əvvəlcə ''Fənərbaxça'' rəsmi hesablarından bu məşqçi ilə danışıqlara başlandığını açıqladı. Günorta saatlarında Jezuşla Əli Koç ''Kalamış Divan'' adlı məkanda görüşərək həm çörək yedilər, həm də uzun-uzadı danışıqlar apardılar. Burda ''Fənər''in digər rəsmiləri də iştirak etdi. Jezuşun məhz iyunun 1-də Türkiyəyə gəlməsi təsadüfi deyil. Məsələ burasındadı ki, ötən ilin dekabrında ''Benfika''dan qovulan mütəxəssisin təzminatında ''yeni bir iş tapmasa, mayın 31-nə qədər hər ay maaşını almaqda davam edəcək'' maddəsi var imiş. Jezuş da bu üzdən mayın 31-nə qədər gözlədikdən sonra Türkiyəyə gəldi və ''Fənər''lə açıq şəkildə danışıqlar aparmağa başladı. Koçla danışıqları başa çatdırdıqdan sonra Jezuş dünən ''Ülkər'' stadionunu ziyarət edərək burda şəkillər çəkdirdi. Jezuş klubun muzeyini də ziyarət etdi. Maraqlıdı ki, ''Fənərbaxça'' ''Trabzonspor''a acıq verərək portuqaliyalının məhz 2010/11 mövsümünün çempionluq kuboku ilə çəkdirdiyi şəkili paylaşdı.

30 ildən artıqdı məşqçilik sahəsində olan Jezuş futbol dünyasında yetərincə tanınmış simadı. O, Vitsel, David Luis, Di Mariya, Ramires, Bernardo Silva, Qaray, Xavi Qarsiya, Rodriqo, Salvio, Qaytan, Oblak, Matiç kimi tanınmış simaları futbol dünyasına qazandırıb və ''Benfika'' da müxtəlif dönəmlərdə bu oyunçuların satışından milyonlarla avrolar qazanıb. 32 illik karyerası boyunca 13 fərqli klubda işləyib və 3 Portuqaliya, 1 Braziliya çempionluğu olmaqla ümumilikdə 16 titul qazanıb. Son 14 ildə ''Braqa'', ''Benfika'', ''Sportinq'', ''Əl-Hilal'', ''Flamenqo'' kimi klubları çalışdırmış Jezuş məşqçi kimi indiyə qədər 834 matçın 516-dan qələbəylə ayrılaraq, hər oyuna orta hesabla komandalarına 2,04 xal qazandırıb. Onun daha bir diqqətçəkən özəlliyi odu ki, 7 dəfə komandaları ÇL-in təsnifat mərhələsində iştirak edib və bunların 5-də qrup mərhələsinə yüksəlməyi bacarıblar. ''Fənərbaxça''nın da ÇL-də mübarizəyə 2-ci təsnifat mərhələsindən başlayacağını nəzərə alsaq, Jezuşun bu özəlliyi istanbullulara böyük fayda verə bilər. Jezuşun futboldan əlavə ticarət sahəsində də fəal olduğunu bildirək. O, öz ad və soyadının baş hərflərindən ibarət olan ''JJ'' geyim markasını da yaradıb. Məşqçi bu markaya aid köynək, papaq və şort satışından da ciddi pullar qazanır. Bu məşqçi ilə bağlı hətta ''Fənər''in əfsanəsi Aleks de Souza da paylaşım edərək ona yeni işində uğurlar arzulayıb.