Ayxan Abbasov: "Çempionata rəng qatmaq istəyirik" - AÇIQLAMA
Xəbər verdiyimiz kimi artıq Ayxan Abbasovla rəsmi müqavilə imzalanıb.
Football-plus.az xəbər verir ki, 41 yaşlı mütəxəssis təəssüratlarını bizimlə bölüşdü:“Yenidən Tovuzda olmaq mənim üçün çox xoşdu. Bura mənə doğmadı. Futbolçu kimi Tovuzda çox gözəl günlərim keçib. Baş məşqçi kimi yenidən burda olmaq isə tam fərqli hissdi. Açığı rəhbərlik, işçi, məşqçi heyəti və əsası azarkeşlər tərəfindən belə qarşılanmaq məni qürurlandırdı. 9 ildən sonra premyer-liqaya qayıtmaq hər birimizin arzusu idi. Çempionata rəng qatmaq istəyirik. Əlbəttə işlərimiz çoxdu. Tovuzun futbol ənənələri hər kəsə bəllidi. Futbolumuzda iz qoymuş onlarla ad bəxş edib, hansılar ki, hazırda akademiyada çalışırlar. Birlik olmalıyıq. Həm rəhbərliyin həm də azarkeşlərin dəstəyini tam olaraq hiss edirəm. İnanıram ki, tək əsas komanda deyil, əvəzedici və aşağı yaş qrupları üzrə komandaların məşqçiləri ilə birlikdə əl-ələ verib bütün çətinliklərin öhdəsindən gələ biləcəyik”.
Ayxan Abbasov gələcəklər planlar haqda da məlumat verdi:
“İlk olaraq futbolçularla müqavilələr rəsmiləşməlidi. Bir neçə futbolçu ilə artıq razılıq əldə olunub və qısa müddətdə onlarla müqavilə bağlayacağıq. İyunun 19-u Bakıda təlim-məşqlərə start verəcəyik. Əvvəlcə yerli futbolçuları, akademiyanın üzvlərini baxışdan keçirəcəyik. Ayın 27-dən isə hazırlığın əsas mərhələsinə başlayacağıq. Gürcüstanda təlim-məşq toplanışı keçirməyi də planlaşdırırıq”.
Digər xəbərlər
