Uzun sürən müzakirələrdən sonra, nəhayət, növbəti mövsüm premyer-liqada mübarizə aparacaq “Turan Tovuz”u kimin çalışdracağına aydınlıq gəldi.

Müşahidə Şurasının srağagünkü iclasında klubun başbilənləri baş məşqçi postuna Ayxan Abbasovu gətirməyi lazım bildi. Xatırladaq ki, Ayxan bəyin son iş yeri “Sumqayıt” olub və ötən ilin dekabrında “kimyaçılar”dan ayrılıb. Dünən “boz qurdlar”ın yeni çalışdırcısı ilə yeni iş yeri və planlarla bağlı söhbətləşdik.

- Tovuz klubundan təklif gələndə “hə” demək üçün çox düşündüz?

- Əvvəlcə onu bildirim ki, Tovuz mənim üçün heç də yad bölgə sayılmır. Futbolçu olduğum dönəmdə iki dəfə fərqli vaxtlarda bu komandanın şərəfini qorumuşam. İlk dəfə “Turan”a gedəndə 24 yaşım var idi. Çox yaxşı komandamız var idi. Tovuzlu azarkeşlərə də söz ola bilməz. Həqiqətən futbolu sevir, onunla nəfəs alırlar. Oqtay Abdullayev və Nadir Nəbiyevlə danışandan sonra təklifi müsbət dəyərləndirməyi lazım bildim. Söhbət zamanı hiss etdim ki, hər ikisi Tovuz futbolunun inkişafını fikirləşir, qısa müddətdə premyer-liqada yaxşı mənada adından söz etdirməyi bacaran komanda formalaşdırmaq istəyirlər. Bunun üçün bir yerdə çalışacağıq. Ancaq elə məsələlər var ki, tək məndən və ya rəhbərlikdən asılı deyil. Onu da bilirdim ki, məndən başqa da baş məşqçi postuna namizədlər var idi. Rəhbərlik onlarla da görüşüb, klubun inkişafı və gələcəyi barədə müzakirələr aparıb. Sonda mənə güvəndikləri üçün rəhbərliyə təşəkkür edirəm. Tovuz klubu həmişə qəlbimdə olub. Futbolçu kimi bu komanda ilə bağlı çox şirin xatirələrim var. Klubun gələcək planlarını biləndən sonra təklifi qəbul etməklə bağlı tərəddüdüm qalmadı.

- Klubun siyasəti bəllidi. Daha çox gənclərə şans yaradılacaq və yerli uşaqlara oynamaq imkanı veriləcək. Avrokubok təcrübəsi, premyer-liqanın mükafatçısı olan mütəxəssis kimi gənclərlə işləmək sizə çətin olmayacaq? Demək olar ki, hər şeyə sıfırdan başlamalı olacaqsız.

- Elə komanda formalaşdırmalıyıq ki, gənclərlə yanaşı, onların inkişafı üçün yanlarında təcrübəli futbolçular və legionerlər olsun. Büdcənin imkanı verəcəyi həddə kollektiv yaradacağıq. Ancaq gəncləri də unutmamalıyıq. Yenə təkrarlayıram, onların inkişafına çalışmalı, səbirlə perspektivli uşaqları yeni səviyyəyə çatdırmalıyıq. Bu məni qorxutmur. Bu barədə də rəsmilərlə söhbətimiz olub. Bəzi planlar var ki, onları reallaşdıra bilsək, gələcək adına böyük işlər görə biləcəyik.
- Hər halda, yeni komanda formalaşdırmaq və tələbkar tovuzlu azarkeşlərin rəğbətini qazanmaq heç də asan iş deyil. Özünüz də qeyd etdiz ki, tovuzlular futbolu çox sevir və həmişə komandadan baxımlı oyunla yanaşı, nəticə tələb edirlər.

- Əlbəttə, çətin olacağını hamımız bilirik. Ancaq Tovuza inamlı yollanıram. İnanıram ki, 9 il premyer-liqa həsrətində olan azarkeşlər, həm də rəhbərlik bizə güvənəcək. 9 ildən sonra premyer-liqaya dönən komandanı çalışdırmaq mənə motivasiya verir. “Sumqayıt”a da gələndə, demək olar, oxşar durum idi. Komanda uzun illər avrokuboklara vəsiqə qazanmağı arzulasa da, alınmırdı. Ancaq səbirlə çalışıb sonda istədiyimizə çatdıq. Baş məşqçi kimi müəyyən təcrübəyə malikəm və rəhbərliklə fikirlərimiz üst-üstə düşür ki, bu da müsbət məqamdı. Özünəməxsus oyun üslubumuz olacaq.

- Məşqçi karyeranız ərzində yalnız Bakıda və paytaxta yaxın ərazidə çalışmısız. Bölgəyə yollanmaq, ora uyğunlaşmaq sizi narahat etmir?

- Mən həmişə çempionatda bölgə klublarının olmasının tərəfdarı olmuşam. Bölgə təmsilçisləri gənc oyunçuların inkişafında, irəli getməsində böyük rol oynayacaq. Bu gün hər bir futbolçu Bakıda oynamaq və yaşamaq istəyir. Bunu hamımız çox yaxşı bilirik. İstər məşqçi, istərsə də futbolçu karyerasını düşünürsə, inkişaf etmək istəyirsə, müəyyən məhrumiyyətlər deməyim, bir müddət nədənsə imtina etməlidi. Bu da məşqçi işinin bir parçasıdı. Bölgədə çalışmaq həm çətin, həm də məsuliyyətlidi. Özümüz də görürük ki, rayonlarda azarkeş stadiona gəlir, tribunalarda anşlaq yaşanır. Sumqayıtda da eyni vəziyyət idi. Böyük azarkeş kütləsinin qarşısına çıxırdıq, təzyiqlə üzləşirdik. Tovuzda da məni və komandanı nələrin gözlədiyini göz önünə alıram. Peşəkarıqsa, bu yola başlamışıqsa, bölgələrdə də çalışmalıyıq.

- Təyinatınız rəsmiləşəndən sonra Oqtay Abdullayev bizə açıqlamasında bəzi şərtlərlə bağlı sizinlə görüşüb danışacağını bildirmişdi. Görüş olub?

- Həm Oqtay Abdullayev, həm də Nadir Nəbiyev ilə təyinatdan öncə görüşümüz olmuşdu. Mən onların şərtləri ilə tanış oldum, onlar məni dinlədi. Hər ikisi futbolda iz qoymuş şəxslərdi. Bu görüş Müşahidə Şurasının toplantısından öncə baş tutmuşdu. Yaxın günlərdə yenidən bir araya gələcəyik, bütün detallar bir daha müzakirə olunacaq.

RƏŞAD