Nəhayət, millinin qələbəsinə sevindik.

Dünən keçirilən Millətlər Liqasının qrup mərhələsinin 4-cü turunda yığma doğma meydanda Belarusa qalib gəldi. Mərhələnin ilk 3 oyununda nəinki qələbə, qola belə həsrət qalsaq da, tilsim, nəhayət ki, qırıldı. İstər Qazaxıstana, istərsə də doğma meydanda Slovakiyaya uduzandan sonra komanda haqlı qınağa tuş gələrək, yetərincə tənqid olundu.

Dünənki qələbə isə aranı bir qədər sakitləşdirdi. Millinin ilk 4 oyundakı statistik göstəriciləri maraq doğurduğundan qısa araşdırma apardıq.

Canni de Byazinin yetirmələri bu matçlarda qapıya ümumilikdə 47 zərbə vurub ki, zərbələrdən 17-si “çərçivə”yə düşüb. Komanda 18 dəfə topu oyuna künc nöqtəsindən daxil edib. 6 dəfə oyundankənar vəziyət qeydə alınıb. Maraqlıdı ki, bunlardan 5-i Belarusla ilk qarşılaşmaya təsadüf edib.

Qayda pozuntularına gəlincə, futbolçularımız 45 dəfə rəqib oyunçulara qarşı kobud davranıb. Bunun 8-də isə hakim tərəfindən cəzalandırılıb. 7 sarı vərəqə qeydə alınıbsa, Belarusla ilk qarşılaşmada Qismət Alıyev birbaşa “qırmızı” ilə meydandan kənarlaşdırılıb.

Topa sahibolmada millimiz Slovakiya ilə qarşılaşma istisna olmaqla, qalan matçlarda rəqiblərdən üstün olub. Ümumilikdə 4 oyunda topa orta hesabla 52 faiz yiyələnmişik.

ŞAİR ABDULLA