Mini-futbol yığmamızın Slovakiyanın Koşitse şəhərində baş tutan Avropa çempionatında kubok qazanması münasibətilə konsert proqramı təşkil olunacaq.

“Football-plus.az” saytının məlumatına görə, sabah Bakı bulvarının ərazisində (Zəfər parkı ilə üzbəüz) keçiriləcək tədbir saat 19.00-da başlayacaq. Konsertin təşkilatçıları Gənclər və İdman Nazirliyi, Azərbaycan Minifutbol Federasiyası, “Azfar Group”, “Zirə” PFK, sponsor isə “Nar Mobile” şirkətidi.

Konsert proqramında rəsmi şəxslər və mini-futbol millisinin baş məşqçisi Elşad Quliyev çıxış edəcək, xüsusi avtobusla kubok tamaşaçılara təqdim olunacaq. Müğənnilər Zülfiyyə Xanbabayeva, Miri Yusif və Səmra mahnılar səsləndirəcək. Futbol azarkeşləri və şəhər sakinlərini konsert proqramına dəvətlidi.

Qeyd edək ki, Azərbaycan yığması tarixində ikinci dəfə qatıldığı Avropa çempionatının finalında Rumıniyaya 1:0 qalib gələrək qızıl medalların sahibi olub.