Adı bir dönəm ''Beşiktaş'' və ''Trabzonspor''la hallanan ''Ştutqart''ın müdafiəçisi Atakan Karazorla bağlı qalmaqallı xəbər yayılıb.

Almaniyada doğulan türkiyəli futbolçu İbitsa adasında tətildə olarkən həbs edilib. Klubdan verilən açıqlamada yalnız ''Atakan İbitsada həbs olunub. Oyunçumuz bütün ittihamları rədd edir və vəkillərimiz onunla tez-tez əlaqə saxlayır'' sözləri qeyd olunub və həbsin səbəbi barədə məlumat verilməyib. Amma Almaniya mətbuatının yazdığına inansaq, 25 yaşlı futbolçu 18 yaşlı ispaniyalı qıza cinsi təcavüz etməkdə günahlandırılır. Onun Almaniyaya nə vaxt qayıdacağı barədə məlumat verilmir. Qeyd edək ki, daha öncə ''Bohum'' və Dortmund ''Borussiya''sının ikinci komandasında, eləcə də ''Holştayn''da top qovan Atakan 2019-dan şvabiyalıların şərəfini qoruyur. Ötən mövsüm bundesliqada 24 oyuna çıxan bu futbolçunun klubu ilə 2026-ya qədər müqaviləsi var. Yığma ilə bağlı hələ seçim etməyən Atakan Karazorun Türkiyəyə üstünlük verəcəyi gözlənilir.