Millətlər Liqasının Belçika – Niderland matçı bir qədər gözlənilməz hesabla nəticələnib.

Brüsseldə keçirilən oyun qonaq komandanın 4:1 hesablı qələbəsi ilə başa çatıb. Qeyd edək ki, Niderland yığması bu rəqibinə son 25 ildə ilk dəfə qalib gəlib. “Narıncılar”ın “qırmızı iblislər” üzərindəki əvvəlki qələbəsi (3:1) 1997-ci ilin sentyabrında DÇ-1998-in seçmə turnirində qeydə alınmışdı. Həmin görüşdən sonra baş tutan 8 yoldaşlıq matçından 2-si Belçikanın qələbəsi ilə, 6-sı isə heç-heçə başa çatmışdı.

Niderlandın inamlı qələbəsində dubl etməklə rol oynayan Memfis Depay milli formadakı qollarının sayını 41-ə çatdırıb. “Barselona”nın hücumçusu yığmanın bombardirlərinin siyahısında Patrik Klyuverti (40) arxada qoymaqla 3-cü yerə çıxıb. O, indi Robin van Persi (50) ilə Klaas Yan Huntelaardan (42) geri qalır.