Serxio Peres Monako “Qran-pri”sində qalib gələn ilk meksikalı oldu.

“Red Bull”un pilotu mövsümün 7-ci mərhələsindən sonra bəzi maraqlı açıqlamalar verib.

- Serxio, podiumda çox emosional göründüz. Monako uğuru karyeranız üçün nə dərəcədə önəmlidi?

- Monakodakı qələbənin dəyəri yüksəkdi, çünki hər pilot burda birinci olmaq istəyir. “Formula-1”də debüt edəndən və Monako trassında sükan arxasına keçəndən sonra günlərin birində burda qalib gəlməyi arzulayırsan. Mənim üçün çox önəmli olan, qeyri-adi nəticə göstərdim. Monakoda vaxtilə Pedro Rodrigesin yararlandığı dəbilqənin rənglərinə uyğun dəbilqə taxdım. Əminəm ki, o mənim bu idman növündə qazandığım uğurlara görə qürur duyardı.

- Parlaq strategiya sayəsində 3-cü yerdən liderliyə yüksəldiz. Kokpitdə olarkən hər şeyin buna doğru apardığını anlayırdız, yoxsa pit-stopdan sonra trassa lider kimi qayıtmaq sürpriz oldu?

- Yox, sürpriz olmadı, çünki həmin məqamda trassın artıq quruduğu aydın idi. Yağış təkərləri qızmışdı, ancaq anlamırdım ki, bununla sona qədər gedə biləcəyəmmi? Karlos Saynsın həmin məqamda çox vaxt itirdiyini görə bilərdiz. Mən onda arxadaydım. Lazımi məqamda hücum etdim. Komanda ilə aramda əla anlaşma var idi – maksimal nəticə üçün nə etməli olduğumu mənə deyirdilər. Bizdə hər şey yaxşı alındı. Belə vəziyyətlərdə səhvə yol vermədən hücum etmək çətindi. Ümumiyyətlə, Monakoda heç vaxt asan olmur.

- Sayns son dövrələrdə sizi ciddi təzyiq altında saxladı.

- Onun yürüşün axarına nəzarət etdiyini görürdüm. Sonra – 3-4-cü döngələrdə maşının dönmə qabiliyyətində çətinlik hiss etdim, bu hər dövrədə güclənirdi. 10-cu döngədə səhv etməməyin daha önəmli olduğunu bilirdim. Finişə yaxın vəziyyəti daha da qaydasına sala bildim.

- Təsnifat mərhələsinin yekunlarına görə yaşadığınız məyusluqdan əsər-əlamət qalmadı.

- Bəli, “Formula-1” belədi. Saniyələr içində vəziyyət dəyişir. Bazar günü yaşadıqlarımdan çox razıyam. Bundan sonra məni nə gözlədiyi haqda çox düşünmək istəmirəm, qələbənin həzzini yaşamaqdayam.

- Müqavilənizlə bağlı vəziyyəti aydınlaşdırın (bu haqda başqa xəbərdə oxuyun – red.). Yarışdan sonra “çox tez imzaladım” kimi ifadə işlətdiz. Söhbət müqavilədən gedir?

- “Şampan” butılkasını nəzərdə tuturdum (heç inandırıcı deyil – red.). Müqavilə məsələsini aydınlaşdıracağıq. Ümid edirəm ki, Monakodakı nəticənin faydası dəyəcək.

- Monako qələbəsinə İndi-500 və Le-Man qələbələrini əlavə etmək istəmirsiz?

- Düzünü desəm, İndianapolis məni maraqlandırmır. Dözümlülük yürüşlərinə gəlincə, bunu da bilmirəm. Bəlkə də bir dəfə sınayaram. Düşünürəm ki, “Formula-1”dən ayrılandan sonra evə dönüb uşaqların tərbiyəsi ilə məşğul olacam. Üç uşağım var, iş çoxdu. Düşünürəm ki, Le-Man və İndianapolis mənlə birgə podiuma qalxan pilotları daha çox maraqlandıra bilər.