2021/22 mövsümü “Qarabağ” üçün uğurlu alındı desək, yanılmarıq.

Ağdamlılar premyer-liqanın qalibi oldu, kubokun finalına vəsiqə qazandı. “Köhlən atlar” Konfrans Liqasının pley-offuna vəsiqə qazanmaqla da ölkə futbolu tarixində bir ilkə imza atdı. Ağdam təmsilçisinin transferləri də uğurlu alındı. Kadi Borgeslə İbrahima Vaci komandanın tapıntılarındandı. Düzdü, Qaspar Panadero istənilən effekti vermədi. Leandro Andrade ilə Rüstəm Əhmədzadə gələcəyə hesablanan transferlərdi. Ramil Şeydayevlə Riçard Almeydanın çıxışını da qənaətbəxş saymaq olar.

Ağdam təmsilçisinin hücum xəttində porblemlər var idi. Komanda səviyyəli forvard tapa bilmirdi. Amma bu mövsüm həm İbrahima Vaci, həm Ramil Şeydayev, həm də gənc Musa Qurbanlı özünü yaxşı tərəfdən göstərə bildi. Amma əsas diqqət ötən ilin avqustunda transfer olunan seneqallı Vaciyə idi. Norveçin “Hauqesunn” klubundan transfer olunan futbolçu “Qarabağ”ın heyətində keçirdiyi 27 matçda 16 qol vurdu, 3 məhsuldar ötürmə ilə yadda qaldı. 25 yaşlı forvardla “Qarabağ”ın uğurlu çıxışı, burdakı gələcəyi, çempionluq və kubokun finalı haqda söhbətləşdik.

- Azərbaycan premyer-liqasında qalibi olduz. Çempionluqla bağlı hisslərini bilmək maraqlıdı...
- Çox xoşbəxtəm. “Qarabağ”ın çempionluğunda mənim də payımın olması möhtəşəmdi. İndi gələcək haqda düşünmək lazımdı. Növbəti hədəflərimiz uğrunda mübarizə aparmalıyıq.

- Bu sənin karyeranda ilk çempionluq idi...
- Bəli. Möhtəşəm hisslərdi. Özümü qeyri-adi hiss edirəm. Çempionluğu əldə etmək əla duyğudu.

- Kubokun finalında “Zirə” ilə qarşılaşacaqsız. Həmin görüşdə qələbə qazana biləcəksiz?
- Məqsədimiz budu. Kubokun da qalibi olmaq istəyirik. Çətin görüş olacaq. Finalda hər şey baş verə bilər. Amma qələbə qazanmaq istəyirik. Ümid edirəm ki, bu hədəfimizə də çatacağıq.

- Çempionlar Liqasının qrupuna vəsiqə qazanmaq da hədəflərdən biridi?
- Bunu hamı istəyir. Azarkeşlərimiz, klub rəhbərləriyi, futbolçular Çempionlar Liqasının qrupuna vəsiqə qazanmağı arzulayır. Bunun üçün əlimizdən gələni edəcəyik. Allahın köməyi ilə istəyimizə çatacağıq. “Qarabağ” bir dəfə Çempion Liqasının qrupunda oynayıb. İndi də bunu edə bilərik. Möhtəşəm və güclü komandamız var. Komanda yoldaşlarıma güvənirəm. Yenidən bu uğura imza atacağımıza əminəm.

- Premyer-liqanın bombardiri olmaq üçün 1 qolun çatmadı. Buna təəssüflənirsən?
- Əlbəttə, yox! Çünki bu ada komanda yoldaşım layiq görüldü. Onun adına çox sevinirəm. Əlbəttə, bütün hücumçular qol vurmağa, komandasının qələbə qazanmasına çalışır. Klubun uğurları həmişə fərdi mükafatalardan üstün olub. Kadini bombardir olması münasibəti ilə təbrik edirəm. O, buna layiq idi. “Qarabağ”ın hər futbolçusunun uğuru mənimdi. Çünki biz komanda yoldaşıyıq. Hədəflərimizə çatmaq üçün birgə çalışırıq.

- Bəzi media təmsilçiləri iddia edir ki, mövsümün sonunda “Qarabağ”ı tərk edəcəksən. Bu haqda nə söyləyə bilərsən?
- “Qarabağ”la müqaviləm var. Hazırda özümü xoşbəxt hiss edirəm. Burda qalıb, daha böyük uğurlar əldə etmək istəyirəm.

İLKİN SULTANLI