Bazar ertəsi “Səbail”in Aftandil Hacıyevlə yolları ayırması xəbəri idman ictimaiyyətində şok effekti doğurdu.

Xəbərin yayılmasından cəmi bir neçə dəqiqə sonra redaksiyamıza daxil olan bilgidə “dənizçilər”i növbəti mövsümdən Şahin Diniyevin çalışdıracağı deyildi. Daha sonra isə paytaxt təmsilçisinin baş məşqçi postuna Mahmud Qurbanovun gətiriləcəyi gündəmə düşdü. Hətta “Neftçi-2”nin baş məşqçisi ilə “Səbail” rəhbərliyinin görüşdüyü də söylənildi. Təbii ki, bunlar iddiadı. Ən doğru məlumatı klub rəhbərliyi bilir. Buna görə də “dənizçilər”in icraçı direktoru Fərəc Əliyevlə danışıb, bizi maraqlandıran suallara cavab tapmağı lazım bildik.

- Aftandil Hacıyevlə yeni müqaviləyə imza atandan cəmi 10 gün sonra yollar ayrıldı. Buna səbəb nə oldu? Axı baş məşqçi mətbuat konfransında növbəti mövsümdə hər şeyin daha yaxşı olacağını, tam fərqli “Səbail” görəcəyimizi demişdi...

- Bəli, müqaviləni mayın 13-də bağladıq. Amma gələcək üçün müzakirələrimiz gedirdi. Yekunda qərara gəldik ki, əməkdaşlığı bitirək. Çünki baş məşqçi ilə rəhbərliyin fikirləri üst-üstə düşmədi. Ona görə də bu qərarı qəbul etdik.

- Deyilənə görə, anlaşılmazlığa səbəb Aftandil bəyin yeni transferlər üçün söz haqqının yalnız özündə olmasını və rəhbərliyin bu məsələyə müdaxilə etməməsini istəməsi olub? Bu doğrudu?

- Bizdə futbolçularla bağlı məsələlərə nə rəhbərlik, nə də sponsor qarışır. 2016-cı ildən “Səbail”dəyəm, belə hal yaşanmayıb. Komanda ilə bağlı məsələlərdə söz haqqı həmişə baş məşqçidə olub. Buna görə də deyilənlər həqiqəti əks etdirmir. “Səbail”də belə şey olmayıb, olmaycaq da. Aftandil bəylə müqavilənin pozulmasında bir neçə məqam var. Amma bunu açıqlaya bilmərəm.

- Məşqçilər korpusunun üzvləri də Hacıyevlə birlikdə gedib?

- Bəli. Bilirsiz ki, yeni baş məşqçi gələndə öz komandasını da gətirir. Birlikdə çalışdığı insanlarla işləmək istəyir. Buna görə də qərara aldıq ki, Aftandil bəylə birlikdə məşqçilər heyəti ilə də yolları ayıraq.

- Baş məşqçi postuna Şahin Diniyevlə Mahmud Qurbanovun namizəd olduğu söylənilir. Başqa adlar da var bu siyahıda?

- Siz indi zəng edib Şahin Diniyevlə Mahmud Qurbanovun adını çəkdiz. Bir saat əvvəl isə zəng edib başqa adları dedilər (gülür). Dünən başqa bir ad söyləyirdilər. Başa düşürəm, sizə də hansısa informasiya ilə gəlib çatır ki, bu şəxslər ola bilər. Ancaq bir şeyi dəqiq deyə bilərəm ki, sizə sabaha və ya o birisigünə kiminsə adını çəkə bilərəm. Qısa zamanda bu məsələni həll etməyə çalışırıq. Bu gün kimlərlə danışıq apardığımızı deməyim düzgün deyil. Səbirli olaq. Qısa müddətdə, bu həftə namizədlərdən biri ilə razılığa gəlməyi düşünürük. Təbii ki, dəqqiqləşən kimi mediaya açıqlayacağıq. Dediyim kimi, qısa zamanda yeni baş məşqçi ilə müqavilə bağlayacağıq.

SƏNƏM FƏRHADOVA