Əfqan Həmzəyev Rəşad Əhmədovun “Sabah”a haqsızlıq etdiyini düşünür
“Orda qırmızı verəqəlik heç nə yox idi”.
Ötən turun ən dramatik oyunu, sözsüz, “Sabah”la “Sumqayıt” arasında baş tutdu. Heç kim “bayquşlar”ın “kimyaçılar”a xal verəcəyini düşünmürdü. Lakin 53-cü dəqiqədə baş hakim Rəşad Əhmədovun Amin Seydiyevi birbaşa qırmızı vərəqə ilə meydandan kənarlaşdırması hadisələrin axarını kəskin dəyişdi. Ədalət təmsilçisinin fikrincə, “Sabah”ın müdafiəçisi rəqibin aşkar qol imkanını əlindən alıb. Buna görə də Masazır təmsilçisinin köməkçi məşqçisi, futbolçuları, rəsmi sosial şəbəkə hesabları görüşdən sonra “Sabah” – “Qəbələ” matçında yaşanan oxşar epizodun videosunu paylaşdılar. Murad Musayevin köməkçisi və yaxın dostu Vitali Kornev Azərbaycan futbolunda hakimlərin sifarişlə işlədiyini paylaşımında qeyd edərək, bölgə təmsilçisinin futbolçusu Murad Musayevə “tələbələr”lə oyunda “sarı”, Amin Seydiyevə isə birbaşa “qırmızı” verilməsini ironiya ilə vurğuladı. Futbol ictimaiyyətinin böyük əksəriyyəti də referinin qərarının çox sərt olduğunu dilə gətirdi.
Görəsən, Rəşad Əhmədov “Sabah”a qarşı haqsızlıq edib? Bu epizodda “qırmızı” göstərməyə ehtiyac var idi? Bunu öyrənmək üçün Əfqan Həmzəyevlə danışdıq. Sabiq hakim Murad Musayevlə Amin Seydiyevin epizodlarını müqayisəli təhlil etdi: “Birinci epizodu da görmüşdüm. Rauf Cabbarovun idarə etdiyi matç idi. Onda da qeyd etmişdim ki, hakimin burda sarı vərəqə verməsi haqlı idi. Çünki meydanın mərkəzində olan epoziddu. Kənardan müdafiəçilərin çatmaq ehtimalı var. Oyunçu da topu atıb qaçır. Yəni top onun nəzarətində deyil. Keçir və müdafiəçi də onu tutub yıxır. Yəni bu topa çatmaq ehtimalı var, kənardan müdafiəçilərin onu yaxalaması da realdı. Bəzi nüanslardan çıxış edərək bu epizodlara baxanda bilmək olur ki, sarı vərəqə verilməsi daha haqlı qərar olardı. Burda “qırmızı”dan söhbət gedə bilməz. Şəxsən mən belə düşünürəm. İkinci epizoda baxanda isə, hesab edirəm ki, burda futbolçu cərimə meydançasına daha yaxındı. Amma insanları yanıldan o ola bilər ki, oyunçu təkbətək gedirdi. Futbolçu topu atır vər sol cinahla gedir. Bu hələ ordan ortaya keçməli və hücum edib qapıçı ilə üzbəüz qalmalıdı. Sola getmək hələ təkbətək çıxmaq, bariz qol şansı əldə etmək anlamına gəlmir. Burda oyunçu sarı vərəqə ilə cəzalandırılmalıdı. Belə bir epizodda futbolçuya, ümumiyyətlə, “qırmızı” göstərmək olmaz. Bu mənim şəxsi düşüncəmdi, hakimi tənqid etmək fikrində deyiləm. Hakim o qərarı hansısa nəticəyə gəlib veribsə, buna nəsə deyə bilmərəm. Ola bilər, hansısa qaydalar var ki, onlardan belə epizodlarda sarı, qırmızı vərəqə vermək lazım olduğunu tələb edirlər. Amma sabiq hakim kimi düşünürəm ki, orda qırmızı verəqəlik heç nə yox idi. Şəxsən mən olsaydım, “qırmızı” verməzdim. Bu epizodda da hakim Amin Seydiyevə “sarı” göstərə bilərdi”.
SƏNƏM FƏRHADOVA
Digər xəbərlər
