"Onların mənə çatmağına illər var, Rövşən bunu unutmasın" - ÖZƏL AÇIQLAMA
Premyer-liqanın 27-ci turunda “Sabah”ın futbolçusu Amin Seydiyevin birbaşa qırmızı vərəqə ilə meydandan kənarlaşdırılması bir neçə gündü müzakirə mövzusudu.
"Futbol+"də dərc olunan “Əfqan Həmzəyev Rəşad Əhmədovun “Sabah”a haqsızlıq etdiyini düşünür” sərlövhəli yazıda sabiq referi futbolçuya qırmızı vərəqə verilməsinin səhv qərar olduğunu söyləmişdi. Ötən gün isə xəbərin linkini ənənəvi olaraq qəzetimizin “feysbuk” qrupunda paylaşdıq. Bir müddət sonra maraqlı bir şərh diqqqətimizi çəkdi. Rəşad Əhmədovun atası Rövşən Əhmədov “Mən hakim inspektoram. Epizod haqqında fikir söyləməyə ixtiyarım yoxdu. Həm də, Rəşadın atasıyam. Ona görə də, fikir söyləmək düzgün olmaz. Amma, bunu deməyə məcburam. Ay Əfqan, sən hələ Rəşad kimi hakim ol, sonra fikir söylə” deyərək həmkarını aşağıladı.
Görəsən, Həmzəyev bu barədə nə düşünür? Bunu öyrənmək üçün sabiq hakimlə əlaqə saxlayıb fikirlərini öyrəndik. Əfqan bəyin Rövşən Əhmədova cavabı belə oldu: “Düz deyib də. Mən onun kimi hakim ola bilmərəm, mən hara, o hara. Onların mənə çatmağına illər var, Rövşən bunu unutmasın. Mən indiyə kimi Rövşən haqqında 1 kəlmə də danışmamışam. Amma görürəm ki, o ağlına gələni danışır mənim haqqımda. Mən onun oğlu haqqında danışmamışam, heç danışmaq fikrim də yoxdu. Siz soruşmusuz epizodu təhlil etmişəm. Mənə aidiyyatı yoxdu hakim kimdi. Kim olur olsun, öz şəxsi fikrimi bildirmişəm”.
SƏNƏM FƏRHADOVA
