Alesio barmağını tuşlayır, Mahmud Sadıqov danışıq aparır – ÖZƏL AÇIQLAMA
Bir neçə gün əvvəl tarixində 16-cı dəfə futzal üzrə ölkə çempionu olan “Araz-Naxçıvan”ın baş məşqçisi Joze Alesio da Silva EKOL ilə həlledici oyundan sonra verdiyi açıqlamada “bizi yeni mövsümün startında UEFA Çempionlar Liqasının oyunları gözləyir. Heyətimizi gücləndirməliyik. Azı iki futzalçı komandamıza qoşulmalıdı” demişdi.
Bəs görəsən, klub rəhbərliyi bu haqda nə düşünür? ÇL-ə qatılacaq klubu gücləndirə biləcək yerli futzalçılar varmı? Bu suallarla “Araz-Naxçıvan”ın vitse-prezidenti Mahmud Sadıqova üz tutduq. Onun “Football-plus.az” saytına açıqlaması belə oldu: “U-19 yığmasından üç oyunçu ilə maraqlanırıq. Çox güman, önümüzdəki həftə onlarla görüşüb söhbət edəcəyik. Dünən Alesio ilə görüşdüm, planları haqda məlumat aldım. Burdakı yerli futzalçılarla şəxsən mən özüm görüşəcəm. Onun siyahısında üç oyunçu var idi. Onlardan artıq biri, U-19-un əsas qapıçısı bizdədi. Bir neçə oyunda onu da yoxlamışıq və istədiyimiz nəticəni almışıq. Başqa iki nəfərlə də danışıq aparacağıq. Onlara da şərtlərimizi deyəcəyik. Razılaşsalar, komandamıza cəlb etmək istəyirik. Bildiyimə görə, onların da istəyi var. Mən də istəyirəm ki, komandada gənc oyunçular olsun, beynəlxalq yarışlara aparaq, orda təcrübə yığsınlar. Bizim milli oyunçularımızın da bəzilərini əvəz edəcək futzalçılara ehtiyac var. Biz də “Araz-Naxçıvan” olaraq, bu məsələdə öndə olmaq istəyirik. Ona görə komandaya gənc oyunçular cəlb etməyə çalışırıq ki, daha sonra bu oyunçuların milli komandaya da faydası dəysin”.
Klubun maliyyə durumu necədi? Yeni oyunçuların transferinə bu baxımdan əngəl yoxdu? Vitse-prezidenti dinləyək: “Maliyyə durumumuz əvvəlki kimidi. Əskiklik də yoxdu, artım da yoxdu. Onsuz da gənc oyunçuların məvacibi çox olmur. Bu da bizə büdcə baxımından sərf edir”.
ŞAİR ABDULLA
Digər xəbərlər
