AFFA İcraiyyə Komitəsinin dünənki iclasında “Araz Naxçıvan”, “İmişli” və “Mingəçevir”in növbəti mövsümdən 1-ci divizionda çıxış edəcəyi haqda qərar qəbul olundu.

Çoxlarını düşündürən məsələ isə bu klubların ölkənin 2-ci dərəcəli çempionatında xərcləri necə qarşılayacağıdı. Təbii ki, Region Liqası ilə divizon arasında böyük fərq var. AFFA-nın vitse-prezidenti Vaqif Sadıqov qəzetimizə müsahibəsində qurumun bu klublara maddi yardım ayıracağını bildirib.

Bunu nəzərə alaraq “Mingəçevir”in prezidenti Ruslan Həmidovla danışmağı lazım bildik: “Bütün Mİngəçevir bu dəqiqə ayaqüstədi. Telefonuma çoxlu zəng gəlir. Sağ olsunlar, hamı təbrik edir. Şəhərimiz sevinir. Biz də bunu gözləyirdik. 2003 və 2017-ci illərdə divizionda çıxış etmişik. Amma çox zəif oyun göstərmişik. Maddi cəhətdən də pis vəziyyətdəydik. Azarkeşlərimiz də azalmışdı. Böyük futbol Mingəçevirə qayıdır. İnşallah, gələcəkdə milli komandaya da futbolçu verəcəyik. Tam peşəkar bir klub yaradacağıq. Futbolun İnkişaf Fondunun rəhbəri ilə görüşmüşəm. Onlar dedi ki, ilk növbədə “Kəpəz” və “Turan Tovuz”la məşğul oluruq. Yəni hazır peşəkar klublara sponsor tapırıq. Mayda növbəti görüşümüz olacaq. Şəhərimizdən də kömək edənlər olacaq ki, Mingəçevirdə futbol olsun. Bizim üçün nə qədər pul ayrılacağını bilmirik. Rövşən Əhmədov əlaqə saxlayacaq. Divizionda oynayan mingəçevirli futbolçular da var. Çox güclü klub yaradacağıq. Məqsədimiz çempionluq uğrunda mübarizə aparmaq olacaq. Elxan Məmmədov Mingəçevirdə olanda dedi ki, bura böyük futbolu qaytaracağıq. Nə qədər vəsait ayrılacağını daha dəqiq İcra Hakimiyyəti bilər. Stadionumuz da təmir olunacaq. Yüksək səviyyəli komanda yaratmaq planımız var. Yaxın gələcəkdə premyer-liqada çıxış etməyimiz də gözlənilir”.

SƏNƏM FƏRHADOVA