Uzun ayrılıqdan sonra Klublar Komitəsinin iclası keçirilib.

Bu münasibətlə qurumun sədri Riad Rəfiyevi səmimi qəlbdən təbrik edirəm. Rəfiyev bu yaxınlarda verdiyi müsahibələrin birində qeyd etmişdi ki, rəhbəri olduğu komitənin toplanmamasının sadə bir səbəbi var. Belə ki, klubların müzakirə etməli olduğu heç bir vacib problem yox imiş. Azərbaycan futbolunda tam əmin-amanlıqdı, gül gülü çağırır, bülbül də bülbülü. Ona görə də çox hörmətli cənablar qızıldan qiymətli vaxtlarını sərf edib, bir araya gəlməyə ehtiyac görməyiblər. Nəhayət, həmin mövzu tapılıb və Azərbaycan premyer-liqasında mübarizə aparan klubların nümayəndələri bir araya gəlib. AFFA və PFL-in təmsilçiləri də tədbir keçirilən məkana gəliblər. Toplantıda növbəti mövsüm Azərbaycan premyer-liqasında legioner limiti və əvəzetmə sayı ilə bağlı məsələlər müzakirə olunub. Özləri deyib, özləri də eşidib. Sonra da dağlışıblar.

Futbolumuzun gəldiyi hazırkı nöqtə məni xeyli təəssüfləndirir. Təsəvvür edin, Klublar Komitəsinin iclasları o qədər əhəmiyyətsizdi ki, əvvəlcədən keçiriləcəyi ilə bağlı nə mətbuata, nə də azarkeşlərə məlumat verilir. Onsuz da öyrəncəliyik. Bilirik ki, bu qalstuklu cənablara nə mətbuatın mövqeyi maraqlıdı, nə də azarkeşlərin. Heç kimi veclərinə almırlar. Əvvəllər toplantının yeri və vaxtı barədə açıqlama verərdilər. Sonra da iclac zalından çıxan rəsmilər mətbuat nümayəndələrinin suallarını cavablayar, ictimaiyyəti müzakirələrin axarından xəbərdar edərdilər. Artıq buna ehtiyac duyulmur. Sayələrində biz də bilmirik ki, legioner liminin müzakirəsi zamanı kim hansı təkfli səsləndirib, çox hörmətli klub başbilənləri növbəti mövsümdə limiti necə görmək istəyirlər. Həmçinin əvəzetmələrin sayı ilə bağlı hansı təkliflərin səsləndirildiyindən xəbərsizik. Yaxşı yadımızdadı ki, “Qarabağ”ın baş məşqçisi Qurban Qurbanov hələ xeyli əvvəl əvəzetmə sayı ilə bağlı müzakirələrin aparılmasını təklif edirdi. Amma həmin vaxt bu təklif müzakirə olunmadı, Qurbanovun səsinə səs verən tapılmadı. Görəsən, indi nə baş verir ki, Klublar Komitəsi toplanır və məhz əvəzetməylə bağlı müzakirələr aparır?

Heç nədən xəbərimiz yoxdu. Adama elə gəlir ki, Klublar Komitəsinin iclasında, ümumiyyətlə, müzakirələr aparılmayıb. Hər biri pencək geyib gəlib və fotokameralara poz veriblər. Ondan sonra da arxa fonda görünən divanlarda istirahətlərini edib, yaxşıca dincəliblər. Bütün bu prosedur bitəndən sonra hərə öz klubunun bazasının yolunu tutub. Gediblər ki, Azərbaycan futbolunun inkişafı üçün vacib addımlar atmağa davam etsinlər. Bakı Olimpiya Stadionunun bir küncündə keçirilən bu yığıncaq təkcə Klublar Komitəsinin “dirildilməsinə”, AFFA-nın yaratdığı bu komitənin nəyəsə yaradığını göstərməyə xidmət etmir. Belə toplantılar həm də AFFA-nın yeni baş katibi Sərxan Hacıyevin ictimaiyyətə göstərilməsinə, onun təbliğatına hesablanıb. Belə addımlarla yavaş-yavaş ictimaiyyətə çatdırılır ki, AFFA-nın yeni baş katibi var, bundan sonra millinin nəticələrinə görə ondan hesabat tələb edin, problemlərə görə onu sorğu-suala tutun. Şamaxıdakı “toy-bayram”dan sonra çəkilən bir maraqlı fotoşəkil diqqətimi cəlb etmişdi. İdman jurnalistləri mikrofonlarını və diktofonlarını AFFA-nın icraçı vitse-prezidenti Elxan Məmmədova uzadıb, onu sual-cavab edirdilər. Bir kənarda boynunu büküb, dinləyən Sərxan Hacıyevin isə üzündən məyusluq yağırdı. Gənc kadr az qala qışqırıb, üsyan edirdi ki, AFFA-nın yeni baş katibi mənəm, Elxan Məmmədov deyil, suallarınızı mənə ünvanlayın da...

AFFA-dakı məlum baş katib yerdəyişməsinin nəyə xidmət etdiyini arif adamlar yaxşı başa düşür. Yenə qərarları köhnə adam verəcək, amma məsuliyyət daşımaq lazım gələndə “güllə qabağına” sinəsini gənc kadr sipər etməlidi. Dünyanın işi, daha doğrusu, AFFA-nın divarları arasındakı idarəçilik sistemi belədi. Bu oyunun içinə düşmüsənsə, qaydalara da riayət etməlisən. Qaydaları pozsan, ağır cəzaya hazır olmalısan. Sərxan Hacıyev də bunları yaxşı bilir. Ona görə də təzə kostyumunu əyninə geyib, zövqla seçdiyi qalstuku boynuna salıb, Klublar Komitəsinin iclasına tələsmişdi. Zarafat deyil, məclisin (oxu: toplantının) baş tərəfində özü oturacaq, klub nümayəndələrini baş katib kimi yuxarıdan aşağı süzəcəkdi. Onun xətrinə Klublar Komitəsi tilsimi sındırıb, bir araya gəldi. Görək qarşıda bizi hansı maraqlı sürprizlər gözləyir. Yerimizi rahatlamışıq, tamaşaya davam edin.

AMAL