Dünən Türkiyə çempionatının 34-cü turunda ''Qaziantep'' ''Göztəpə''ni qəbul etdi.

Qonaqlar riyazi cəhətdən elitada qalmaq şansını davam etdirmək üçün hökmən qalib gəlməli idilər. 90 dəqiqə qolsuz tamamlandı və hamı bu matçın elə bu hesabla bitəcəyini gözlədiyi məqamda əlavə olunmuş dəqiqələrdə inanılmaz olaylar yaşandı. 92-ci dəqiqədə zədələnən bir oyunçu üzündən oyunu saxlayan hakim topu qonaqlara verdi. ''Göztəpə''nin yarımmüdafiəçisi Sonər Dikmən qapıçının irəlidə olduğunu görərək vaxt itirmədən təxminən mərkəz xəttindən qapıya zərbə vurdu. Tirdən dönən topu təcrübəli Yahoviç tora göndərərək hesabı açdı. ''Qaziantep''li oyunçular bu qola belə desək, hazırlıqsız yaxalandıqlarını bildirərək etiraz etdilər. Amma qol qaydalara uyğun şəkildə vurulduğundan hakimin onu qeydə almaqdan başqa çarəsi qalmadı. Bundan sonra isə meydanda tarixi bir ''feyr-pley'' örnəyi yaşandı. Qələbəyə hava-su kimi ehtiyac duymasına baxmayaraq ''Göztəpə''nin oyunçuları rəqibə mane olmadılar və ''Qaziantep''li Fiqeyredo mərkəzdən müqavimətsiz şəkildə irəliləyərək hesabı bərabərləşdirdi. Amma bununla olaylar bitmədi. 98-ci dəqiqədə ''Qaziantep'' penalti qazandı. Bu dəfə isə anteplilərin forvardı Muhammet Dəmir rəqibin bir neçə dəqiqə öncə etdiyi ''feyr-pley'' hərəkətinə cavab olaraq penaltini bilərəkdən kənara vurdu! Beləcə bu tarixi oyun 1:1 hesabı ilə yekunlaşdı. Amma fakt budu ki, ''Göztəpə'' acı sonluqla barışaraq ''Yeni Malatyaspor''dan sonra elitanı tərk edən ikinci komanda oldu. Superliqada ümumilikdə 30-cu mövsümünü keçirən İzmir təmsilçisi sonuncu dəfə 2003-də aşağı liqaya yuvarlanmış və 14 ildən sonra - 2017-də elitaya qayıtmışdı.