"Azərbaycan futbolunda böyük problemlər var" - Vəli Qasımov
Şamaxı futbol məktəbinin əlaqələndiricisi olan Vəli Qasımov Şamaxı stadionunda təşkil olunan media-turda iştirak edən jurnalistlərin suallarını cavablandırıb.
Mütəxəssis arena və klub barədə danışdı: “Burda futbol və güləşə maraq olub. Bu gün də futbola maraq artıb. Əvvəl region səviyyəsində olub. Hər məşq zamanı yeni uşaqlar qoşulur. Artıq 150-dən çox uşaq məşq keçir. Onlara baxmaq da çətindi. Amma iş gedir. Balacalar "artırır", orta yaş qruplarında bir az əziyyət çəkirik. Amma 100 faiz Şamaxıdan futbolçu çıxacaq”.
Gənc istedadların tapılması üçün Şamaxıda qalan mütəxəssis görülən işlərdən də bəhs etdi:
“Özüm Şamaxıda qalıram, ailəm isə Bakıdadı. Əsas işim burda olduğundan Şamaxıdayam. Burda 3 yerli məşqçi və 1 inzibatçımız var. D kateqoriyasına malikdilər. Gələcəkdə davam edəcəklər. Məqsəd futbola maraqdı ki, o da artıb. İlk oyunu azarkeşlər gözləyirdilər. Növbəti matçda da stadion dolacaq. Burda futbol çox sevilir. Yaş qruplarına gəlincə, 5-6 yaşdan 13 yaşadək oyunçular var. Hələ onları qruplara bölməmişik. Maraq böyük olduğundan hər məşqə çox sayda uşaq gəlir. Məktəblərdə seleksiya işi aparmışıq, turnirlər keçirmişik. Orda fərqlənən uşaqları məşqlərə cəlb edirik. Bu gün burda 6 yaşdan 13 yaşadək oyunçuları məşq etdirməliyəm. Sabah barədə nəsə deyə bilmərəm. “Keşlə”nin aşağı yaş qruplarından olan uşaqların necə olacağını orda çalışanlar bilər”.
Qasımov süni örtüyün futbolçu yetişdirməyə mane olmayacağına əminliyini gizlətmədi:
“Mən özüm uşaq vaxtı asfalt, taxta üzərində oynamışam. Heç belə şərait yox idi. Süni meydan öyrətmək üçün yaxşıdı. Asfaltda öyrətmək alınmır. Xalçanın üstü rahatdı. Zədələr süni örtüklə yox, yüklənmə ilə bağlıdı. Çox yüklənəndə zədələr də olur. Hər yaş qrupunu düzgün məşq etdirəndə heç bir ziyanı yoxdu. Yaşdan asılı olaraq vaxtı, saatı var. Məsələn, uşağı bir gün 20 kq qaldırmağa məcbur etsən, ikinci gün zədələnəcək. Saatyarımdan artıq məşq etdirmək olmaz. Bu da zədəyə səbəb ola bilər. Kross qaçmaq keçmişdə qalıb. Mən uşaq olarkən o qədər qaçmışam ki... Bu gün hər şey topladı. Sürəti topla, topsuz da qaldırmaq mümkündü. İndi az futbolçular var ki, 30-40 metr qaçsın. 3-4 metr qaçıb sağa, sola, arxaya, qabağa ötürmə verirlər. 4-5 yaş qrupu üzrə təxminən 150 uşaq var. Kiçiklər daha çoxdu. 14-15 yaşlı uşaqlar da gəlir, lakin onları qəbul etmirik. Hərdən şərait yaradırıq ki, gəlib oynasınlar. Rayon üçün yaxşı olan 14-15 yaşlılar var ki, bəzilərini çağırıb məşq etdiririk. Bu gün planda yoxdu ki, onları komandaya götürüb məşq keçək. Futbolu gərək sevəsən. Mən uşaqlıqdan xəstəsi olmuşam. Bu gün Azərbaycan futbolunda böyük problemlər var. Bu rayonlara və kiçik uşaqlara aiddi. İstəyirəm ki, uşaq futbolu qalxsın və gələcəkdə yaxşı futbolçular olsun. Hələlik seleksiya işi yalnız Şamaxı ilə bağlıdı. Lakin gələcəkdə planda var ki, yaxın rayonları da əhatə etsin”.
