Bu gün “Şamaxı” ilk dəfə doğma azarkeşləri ilə görüşəcək.

Şəhərin mərkəzi stadionunda “Neftçi” sınağa çəkiləcək. Oyunda maraqlı hadisələrin yaşanacağı gözlənilir. Şamaxı 30 ildi futbolsuz qalıb. Bu səbəbdən də bu rayonu təmsil edən futbolçular, demək olar ki, yoxdu. Lakin elə “Şamaxı”nın heyətində Şamaxıdan olan birisi var. Söhbət əvəzedici komandada çıxış edən Fuad Bayramovdan gedir. 1998 təvəllüdlü futbolçu komandasının heyətində, doğma şəhərdə meydana çıxa bilər. Bununla bağlı fikirlərini öyrənmək üçün Fuadla əlaqə saxladıq.

- Səni yaxından tanıyaq, futbolçu karyerasına necə başlamısan, hansı klublarda çıxış etmisən?
- 24 yaşım var, 10 ildi futbol oynayıram. “Qarabağ”ın təşkil etdiyi futbol kurslarında iştirak etmişəm. 16 yaşım olanda AZAL-a keçmişəm. Orda məşqçi Mehman Babayev olub. 19 yaşadək futbolçulardan ibarət millidə çıxış etmişəm. Həmin vaxt yığmanın baş məşqçisi Nazim Süleymanov idi. Karyeram ərzində “Şüvəlan”, “Zirə”, “Zaqatala”, “Sumqayıt”, Turan Tovuz”da çıxış etmişəm. 2021-ci ilin iyunundan “Keşlə-2”dəyəm.

- Bu mövsüm “Keşlə-2”nin vacib üzvlərindən birisən. “Şamaxı”nın əsas komandasına yüksələ biləcəksən?
- Sol cinah müdafiəçisiyəm. Bu mövsüm 1-ci divizionda 18 matçda meydanda olmuşam. Baş məşqçimiz Rüstəm Əliyev mənə güvənir. Əlimdən gələni edirəm ki, onun ümidini puç etməyim. Düşünürəm ki, komandanın adının dəyişməsi mənə də sərf edir. Şamaxılı olmağım və performansım əsas komandada çıxış etməyimə şans yaradır. Əlimdən gələni edəcəm ki, doğma kollektivimizin adını daha da yüksəklərə qaldırım. Amma əvvəlcə əsas komandanın üzvü olmaq lazımdı.

- “Şamaxı”nın heyətində çıxış edən yeganə şamaxılısan. Komandanın bu şəhərə köçməsi haqda fikirlərini bilmək maraqlı olardı...
- Doğru buyurursuz. Komandanın heyətində yeganə şamaxılı mənəm. Ad və şəhər dəyişikliyi həqiqətən də məni çox sevindirir. Başqa rayonların klublarında çıxış etmişəm. Həmişə düşünürdüm ki, nə vaxtsa bizim şəhərin də komandası olacaqmı?! Şükürlər olsun ki, bu baş verdi. Düşünürəm ki, şəhərimiz də komandanı çox yaxşı qarşılayacaq. Şamaxı camaatı futbolu çox sevir. İnanıram ki, oyunlarda stadion dolacaq. Əminliklə deyə bilərəm ki, bu matçı səbirsizliklə gözləyən adamlar var. İnşallah, biz də həmin azarkeşləri sevindirmək üçün əlimizdən gələni edəcəyik. Yeni adla yeni şəhərdə ilk matçımızda qələbə qazanacağıq.

- “Neftçi” ilə görüşə səni də aparıblar, yoxsa “Şamaxı-2”nin oyunu üçün nəzərdə tutulmusan?
- Komanda ilə birgə Şamaxıya gəlmişəm. Ümid edirəm ki, ilk “11-lik”də mən də olacam. Baş məşqçimiz Sənan Qurbanov şans versə, layiqincə istifadə edəcəm. Oyuna sonradan daxil olsam da, olar. Baş məşqçi 5 dəqiqə güvənsə belə bəsimdi. Bu şansdan düzgün istifadə etməyə çalışacam.

- Ailən Şamaxıda yaşayır? Ümumiyyətlə, komandanın oyununu izləməyə yaxınlardından kimlər gələcək?
- Ailəm doğma şəhərimizdə yaşayır. Təbii ki, atam, qardaşım, dostlarım stadionda olacaq. Hamının oyuna marağı var. Komandanın adı dəyişən kimi hamı mənə yazırdı ki, nə vaxt burda olacaqsız? İnanırsız, həddən çox adam maraqlanır. Elə olurdu ki, məşqlərə gələrkən yolda dost-tanış soruşurdu. Bakı - Şamaxı yolunda “Keşlə”də oynayıram” deyəndə, soruşurdular ki, “Şamaxı” nə vaxt köçür bura? Hamı deyirdi ki, gəlin gözəl şəhərimizi təmsil edin, biz də sizə dəstək olaq. Ona görə əminəm ki, stadion dolu olacaq.



- Belə başa düşdüm ki, klubun adının “Şamaxı” olması regionda futbolun canlanmasına və inkişafına səbəb olacaq...
- Əlbəttə! Düşünürəm ki, şəhərimizdə klubun olması rayon camaatının futbola marağını artıracaq. İnanıram ki, gələcəkdə “Şamaxı”da yerlilərimin sayı artacaq. Burda istedadlı uşaqlar çoxdu, yaxşı oyunçular yetişə bilər. Mən də çalışacam ki, akademiyaya gənc uşaqlar cəlb edim. Hətta gəlmək istəyənlər də var. Bir çox qohum-qonşu deyirdi ki, Şamaxıda akademiya yaransın, bizim uşağı da qoyaq ora. İndi müəllimlərimizə bəzi uşaqlar var ki, onları məsləhət görəcəm.

- Şamaxılı futbolsevərlərə nə demək istəyirsən?
- “Neftçi”ylə oyunda komandaya dəstək olsunlar. Biz də onların dəstəyindən ruhlanıb qələbə qazanaq. Ümid edirəm ki, “Şamaxı” tezliklə güclü klub olar, Azərbaycanı avrokuboklarda təmsil edər.
İLKİN SULTANLI