Şahmat millimizin üzvü Nicat Abbasov aprelin 30-da seans keçirəcək.

“Football-plus.az” saytının məlumatına görə, Vyanada fəaliyyət göstərən Azərbaycan Mədəniyyət Mərkəzinin və Vyana Şahmat Federasiyasının birgə təşkil edəcəyi seansda 30 avstriyalı peşəkar və həvəskar şahmatçı həmyerlimizin rəqibi olacaq. Tədbirin məqsədi Nicat Abbasovu geniş ictimaiyyətə tanıtmaq, gənclər arasında şahmatın tanınmasına töhfə vermək, həmçinin Avstriya və Azərbaycan şahmatçıları arasında əlaqələri möhkəmləndirməkdi.

Mayın 1-də isə eyni məkanda uşaq və yeniyetmələrlə görüş keçiriləcək. Azərbaycan Mədəniyyət Mərkəzi və Azərbaycan Akademik Birliyinin təşəbbüsü ilə təşkil olunacaq görüşdə Avstriyada yaşayan soydaşlarımız və şahmata həvəs göstərən uşaq və yeniyetmələr iştirak edəcək.