“Qusar”ı tanınmış agent maliyyələşdirir – ÖZƏL AÇIQLAMA
Ötən həftə Region Liqasında 1/4 final mərhələsinin ilk oyunları keçirilib.
“Cəbrayıl” səfərdə “Energetik”i, “Xan Lənkəran” “Füzuli”ni, “Qusar “ isə “Ağsu Siti”ni məğlub edib. Cəbrayıl və Lənkəran komandası barədə son vaxtlar mətbuatda yetərincə xəbərlər paylaşılsa da, “Qusar” sanki bir qədər kölgədə qalıb. Halbuki şimallılar mövsümün əvvəlindən liqanın favoritlərindən biri kimi təqdim olunurdu. Onu da xatırladaq ki, rayonun eyniadlı təmsilçisi cari mövsümdə bütün oyunları qələbəylə başa vuran yeganə komandadı.
Bölgə təmsilçisinin oynayan baş məşqçisi Mahəddin Ağamov “Football-plus.az” saytına açıqlamasında komandanın cari mövsümdəki çıxışı, gələcəklə bağlı planlarından danışdı: “İlk gündən qarşımıza Region Liqasının qalibi olmaq hədəfi qoymuşuq. Şükür Allaha, addım-addım məqsədimizə doğru gedirik. “Ağsu Siti” ilə görüş çətin olsa da, qələbə ilə geri dönə bildik. Ümid edirəm ki, cavab qarşılaşçmasında da azarkeşlərimizi sevindirib adımızı yarımfinalçılar sırasına yazdıracağıq. İndi elə mərhələyə çatmışıq ki, burda zəif komanda olmur. Rəqiblərimizin hər birinə hörmətlə yanaşırıq. Hər birinin heyətində premyer-liqa və divizion təcrübəsi olan oyunçular çıxış edir. Biz də zəif deyilik. Tural Cəlilov kimi yığmada oynamış, “Xəzər Lənkəran”ın kapitanı olmuş futbolçumuz var. Qalan uşaqlar da divizonda çıxış ediblər”.
Region Liqaında çıxış edən əksər komandalar maliyyə sarıdan çətinlik çəkirlər. Onlara yaradım olunması üçün təmsil etdikləri rayon və şəhərin İcra Hakimiyyətlərinə, tanınmış insanlara müraciət edirlər. Bəs “Qusar”da bu yöndə vəziyyət necədi? Mahəddin bəyin reaksiyası belə oldu: “O biri komandalar necə, biz də elə. “Qusar”ın maliyyəsini agent Kamil Məmmədov həll edir. Məmmədov vəsaiti hardan tapır, necə edir, deyə bilmərəm. Əsas odu, bizi pis vəziyyətdə qoymur ki, buna görə ona “çox sağ ol” deyirik”.
Futbol camiəsində gəzən söz-söhbətlərə inansaq, bu il Region Liqasında çıxış edən bəzi komandalar 2022/23 “futbol ili”ndə divizionda çıxış edəcək. “Qusar” bu komandaların sırasında ola bilər” sualına komandanın oynayan baş məşqçisi belə cavab verdi: “Hər şey maliyyədən asılıdı. Pul olmayandan sonra nəinki divizionda, heç Region Liqasında çıxış etmək mümkün deyil. Bu gün ev oyunlarımızı Siyəzən stadionunda keçiririk. Divizionda çıxış etməli olsaq, yenə rəqiblərimizi orda qəbul edə bilərik. Ancaq yenə təkrarlayıram, əsas maliyyə məsələsidi. İndiki vəziyyətdə bizim hansısa qaçqın komanda ilə fərqimiz yoxdu. Buna baxmayaraq, liqada çempion olmaq istəyirik”.
RƏŞAD
Digər xəbərlər
