Premyer-liqada 23-cü turun oyunları keçirilir.
"Qarabağ" dünən doğma meydanda "Şamaxı"nı 8:0 hesabı ilə məğlub edib. Acı yenilgidən sonra qonaqların baş məşqçisi Sənan Qurbanov istefa verib. Bununla bağlı oyunda kapitan sarğısını qolunda daşıyan Şəhriyar Əliyevlə əlaqə saxladıq:
"Biz hər komandaya uyğun fərqli taktikalarla hazırlaşırıq. Çalışırdıq ki, rəqibi öndə sıxaq və boşluq verməyək. Çünki "Qarabağ"a boşluq verəndə hər vəziyyətdən istifadə edir. Usta, səviyyəli futbolçuları çoxdu. Demək olar, hər şansdan yararlandılar. Çox acı məğlubiyyət aldıq. Toparlanmağa çalışacağıq".
Kapitan istefa verən Sənan Qurbanov haqda da danışdı:
"Sənan müəllimlə bir ildən çoxdu birlikdə işləyirik. Ötən il Azərbaycan kubokunu birlikdə götürdük. Qısa zamanda komandanı toparlaya bilmişdi. O, həmişə bizə bunu aşılayıb ki, kuboku qazanmışıqsa, daha artığın edə bilərik. İstefa baş məşqçi və rəhbərliyin qərarıdı. Belə məsləhət biliblər. Sənan müəllimə karyerasında uğurlar arzu edirəm. Birlikdə işləmişik, bəlkə yenə də gələcəkdə birlikdə işləyə bilərik".
GÜNAY VƏLİYEVA