Turan Manafovun çıxış etdiyi Volos "Olimpiakos"u başqa bir azərbaycanlı futbolçu Nazim Bağırovu da transfer etmək istəyib.

Bu məlumatı saytımıza futbolçunun meneceri İlkin Alıyev vermişdi. Lakin Nazim Polşaya yollanmağı üstün tutub. O, 3-cü liqa təmsilçisi "MKS Podlasie Biafa Podlaska"ya transfer olunub və artıq debüt oyununu da keçirib. Nazimlə legioner həyatı, nə üçün Volosu bəyənməyib Polşaya üz tutduğu barədə söhbət etdik.

- Polşa klubuna keçidin necə baş tutdu?

- Gürcüstanın “Şevardeni-1906” klubunda oynayanda artıq Polşadan təkliflər gəlirdi. Amma bir az səbirli davranmağı üstün tutdum. Çünki Avstriya və Xorvatiyanın 2-ci liqasından bir neçə klubla danışıqlar gedirdi. Sadəcə, təkliflər və şərait cəlbedici olmadığına görə Polşaya üz tutdum. Hazırkı komandama qarşı yoldaşlıq oyunundan sonra məşqçi özü birbaşa məni kollektivdə görmək istədiyini söylədi. Daha sonra təklif gəldi.

- Klub rəhbərliyi və futbolçularla münasibətin necədi?

- Çox yaxşıdı. Mənə dəstək olurlar.

- Polşaya getməmişdən öncə Turan Manafovla Volosda idin. Amma oranı bəyənməyib Polşaya getdin. Nə üçün bu addımı atdın?

- Bəli, Turanla bir yerdə idik. Çox istəyirdim ki, bir komandada oynayaq. Amma qismət olmadı. Volosu bəyənməyib yox, alınmadı deyərdim. Düzdü, orda şərait yaxşı deyildi, amma karyera baxımından qalıb oynamaq olardı. “Olimpiakos”da peşəkarlıq yox səviyyəsində idi. Təsəvvür edin, Polşanın 4-cü liqasında olan şərait orda yox idi. Volosdan ayrılmaqda əsas səbəb legioner limitinə düşdüyümə görə idi. Onlar təklif etdilər ki, müqavilə bağlayaq, icarəyə get. Mən isə bununla razılaşmadım. Çünki uzunmüddətli sözləşmə istəmirdim.

- Turanın başına gələnlərdən xəbərdarsan. Bu səni legioner həyatından çəkindirməyə vadar edir?

- Turana qarşı, təbii ki, düz hərəkət etmədilər. Mənə elə gəlir ki, Turan icarədə olduğu üçün bu problemləri yaşadı. Onu qeyd edim ki, əvvəlki məşqçi onu şəxsən istəyib transfer etmişdi. Polşada belə problem yoxdu. Klublar liqanın səviyyəsindən asılı olmayaraq, adama futbolçu kimi hörmət qoyurlar. Ev və başqa lazımi şərait ilə təmin edirlər.

- Polşa və Azərbaycan futbolu arasında hansı fərqlər var?

- Bizim premyer-liqa mənim oynadığım çempionatdan üstündü. Amma 1-ci divizion bura ilə eynidi. Əsas fərq isə odu ki, burda daha sürətli futbol oynanılır və futbolçulardan daha çox vuruşmaq tələb olunur. Bəlkə də ən böyük fərq burda oyunlara skautlar və azarkeşlərin çox gəlməsidi.

- Gedəndə hansı çətinliklərlə üzləşdin?

- Heç bir çətinlik olmadı. Bəlkə də uşaq yaşlarından Avropada yaşadığıma və ingilis dilini bildiyimə görə daha rahat gəldi. Əvvəl 1 il Fransada, daha sonra Latviya və Litvada da yaşamışam.

- Bundan sonra hədəflərin nədi? Azərbaycan klublarından təklif gəlsə, razılaşarsan?

- Çalışacam ki, həmişə irəli gedim. Təbii, bunu zaman göstərəcək. İstəyirəm ki, daha yüksək liqalarda oynayım və ölkəmi layiqincə təmsil edim. Azərbaycanda oynamaq fikrim olmadığına görə bura gəlmişəm. Birinci diviziondan xeyli təklif var idi. Amma yenə də zamanı qabaqlamaq istəmirəm. Sonda sizin vasitənizlə AFFA rəhbərliyinə Avropada olan oyunçulara dəstək verdiyi üçün təşəkkür edirəm.

GÜNAY VƏLİYEVA