Turan Manafov Türkiyə və premyer-liqa klublarından təklif alıb - Meneceri açıqladı
“Səbail”in futbolçusu Turan Manafovun “Olimpiakos”a transfer olunması futbol ictimaiyyətini sevindirmişdi.
Lakin onun Yunanıstanda yaşadığı problemlər komandadan ayrılmasını qaçılmaz etdi. Belində zədəsi olan futbolçu oyunlarda iştirak edə bilmirdi. Bundan başqa, klub tərəfindən normal müalicə olunmadığına görə də Volos təmsilçisində qalmayacağını açıqlamışdı.
Bu problemlərə görə Turan “Olimpiakos”dan UEFA-ya şikayət etmişdi. Görəsən, futbolçunun şikayətinə baxılıb? UEFA “Olimpiakos”a qarşı hansı cəza tədbirləri həyata keçirəcək? Bu suallarla futbolçunun meneceri İlkin Alıyevə müraciət etdik: “Bizə məktub göndərildi ki, iyulun 28-də FİFA tərəfindən qərar veriləcək. Çünki kluba özünü müdafiə etmək üçün mayın 19-na kimi vaxt verilmişdi. “Olimpiakos”dan heç kim danışmayıb. Bizdə bu işlə hüquqşünasımız məşğul olur. Tanınmış hüquq şirkətidi. Turan ora gedəndən sonra klubda baş məşqçi dəyişikliyi oldu. Sonra başqa dəyişiklilər də gerçəkləşdi. Maliyyə böhranı yarandı. Turanın oyunlarda iştirak etməsinə isə belindəki zədə mane oldu. Onlar Turana 2 ay idi maaş vermirdi. Ona görə də şikayət olundu. Müqavilədə bizə oyunçunun məşqlərə aparılıb-gətirilməsinin təmin olunmasına söz verilmişdi. Maaş hər ayın son günündə karta köçürülməliydi. Bu məsələlər də deyilən kimi olmadı. Bundan başqa, bir neçə ay fizioterapiyaya getməliydi. Açığı, getdi də. Amma Yunanıstanda bahalıqdı. O da orda maaşsız yalnız 2 ay dözə, özünü maliyyəsiz 2 ay idarə edə bildi. Yunanıstan klublarından təkcə “Olimpiakos”da yox, əksəriyyətində maliyyə problemləri yaranmışdı”.
Futbolçu iki aydan çoxdu yaşıl meydanlardan uzaq qalıb. Buna səbəb onun “Olimpiakos”dan ayrılmasıdı. Görəsən, bu məqam Turanın karyerasına necə təsir edəcək? Manafov “Səbail”də qalacaqmı? İlkin Alıyevi eşidək: “Türkiyədən “Adanaspor” maraqlanır. Azərbaycandan da bir-iki klub transfer etmək istəyir. Müqavilə ilə “Səbail”ə məxsus olduğuna görə öncə bu klubun rəhbərliyi ilə danışıqlar aparılacaq”.
ŞAİR ABDULLA
Digər xəbərlər
