"Ümid edirəm ki, Avropaya vəsiqə qazananlardan biri də “Qəbələ” olacaq" - AÇIQLAMA
Premyer-liqada sona yaxınlaşırıq. Finişə, sadəcə, 6 tur qalıb.
22 turdan sonra turnir cədvəlinə 52 xalla “Qarabağ” başçılıq edir. Son ölkə çempionu “Neftçi” 41 xalla 2-ci, “Zirə” 36 xalla 3-cü, “Qəbələ” 34 xalla 4-cü pillədə qərarlaşıb. Beşinci “Sabah”ın isə 32 xalı var. Göründüyü kimi, son 3 komanda arasında “avrokubok zonası”na düşmək uğrunda gərgin mübarizə gedir. Son turda “qartallar”ı məğlub edən Masazır təmsilçisi rəqibləri ilə fərqi azaldaraq Konfrans Liqasında iştirak iddiasını artırıb. Eyni sözü Rəşad Sadıqovla Elmar Baxşıyevin komandası haqda demək çətindi.
“Tələbələr”lə müqayisədə bu iki kollektivdə eniş müşahidə olunur. “Zirə” 4, “Qəbələ” isə 5 oyundu qələbəyə həsrət qalıb. Sözsüz, bir ay öncə futbol ictimaiyyətinin 90 faizi ilk “4-lük”də aşkar favorit “Qarabağ”ı nəzərə almasaq, “Neftçi”, “Zirə” və “Qəbələ”nin yer alacağını deyərdi. Doğrudu, bu adlar hələ də yerində qalıb. Ancaq vəziyyət kəskin şəkildə dəyişib. İlk iki pilləni əzəli rəqiblərin tutacağı artıq böyük ölçüdə həll olunub. Sonrakı iki yerdə hansı komandaların qərarlaşacağını demək isə çətindi.
Bunu nəzərə alaraq Ramiz Məmmədovun fikirlərini öyrənməyi lazım bildik. Tanınmış mütəxəssis “Qəbələ”nin avrokuboklara vəsiqə qazanacağına ümid etdiyini bildirdi:
“Futbol elə bir oyundu ki, komandanı heç vaxt bir xətt üzrə tam formada saxlamaq olmur. İlboyu uduzmamaq çox az kluba nəsib olub. Məsələn, “Arsenal” “Barselona”, “Real” kimi dünya futbolunun nəhəngləri bunu bacara biliblər. Komandanın enişi-yoxuşu olmalıdı. Bu təbii haldı. Məncə, bunun bir səbəbi də bəzi oyunçuların yığmada da iştirak etməsi səbəbindən yaranan yorğunluqdu. Həm millinin təlim-məşq toplanışı, həm də klub... Mənə elə gəlir ki, “Zirə” də həmin zolağa düşüb. Oyunçular az-az bir yerdə olur. “Qəbələ”nin də enişinin səbəbi yorğunluq və futbolçularının bir az əvvəlki performansından uzaq düşməsidi. Bəzi hallarda oyunçunu tərifləmək ona bir o qədər xeyir vermir. Bir az sonra görürük ki, fikirləri başqa yerdə, özündənrazı olurlar, rahatlaşırlar və s. “Qəbələ”nin futbolçularının kökdən düşməsi bundan qaynaqlanır. İnanıram ki, qarşıdakı oyunlarda hər şey yerini tapacaq. Düzdü, indidən proqnoz vermək çətindi. Bir ay öncə bəzi mütəxəssislər və jurnalist dostlar “Qəbələ” xal itirəndə dedilər ki, onsuz da artıq avrokuboklara vəsiqə qazanan 4 komanda bəllidi. Hələ o vaxt söyləmişdim ki, “tələsməyin, “Sabah”ın qarşıda deyiləcək sözü var". Komanda qələbələri sıralayır. Avropaya vəsiqə uğrunda mübarizəni davam etdirir. Bu yolda mübarizə aparan komandaların hamısına uğurlar arzulayıram. İnanıram ki, “Qəbələ” layiqli yerini tapacaq. Bu gün onların durumu bir az çətindi. Buna baxmayraq, “Sabah”ı 2 xal qabaqlayırlar. Ümid edirəm ki, Avropaya vəsiqə qazananlardan biri də “Qəbələ” olacaq. “Zirə”də isə vəziyyət bir az fərqlidi. Futbolçular arasında, belə deyək, anlaşma o qədər də yaxşı deyil. “Qəbələ”də isə oyunçular 2 mövsümdü birlikdədi, hamısı bir-birini tanıyır. Fikrimcə, son turlarda “Zirə” də sözünü deyəcək. Bu gün çempionatımızda zəif komanda yoxdu. Bunu son turda “Səbail” də sübut etdi. Sadəcə, komandada bir az ruh düşkünlüyü var. Aftandil Hacıyevin rəhbərliyi altında “Qəbələ”yə qarşı gözəl oyun nümayiş etdirdilər. Məncə, “Səbail”ə 3 xal gözü ilə baxmaq olmaz. Bütün komandalara hörmətlə yanaşmalıyıq. Növbəti turlar daha maraqlı olacaq. Gəlin, hadisələri qabaqlamayaq. Mənə elə gəlir, baxımlı oyunlar hələ irəlidədi”.
SƏNƏM FƏRHADOVA
Digər xəbərlər
