“Qurban Qurbanovun heykəlini ucaldardım" - ÖZƏL AÇIQLAMA
Dünən Qurban Qurbanovun 50 yaşı tamam oldu. Yubileyi münasibəti ilə mütəxəssisi idman ictiamiyyətinin bir çox nüfuzlu siması təbrik etdi.
Onlardan biri də “İnter”in sabiq idman direktoru Alı Alıyev oldu. Vaxtilə birlikdə çalışdığı Qurban bəy barədə ağızdolusu danışan Alıyev “Football-plus.az” saytına açıqlamasında maraqlı məqamlara toxundu. Onlardan ikisini diqqətinizə çatdırırıq:
“Qurban Qurbanovla çox yaxşı işlər görürdük. O zaman o, “İnter”də idman direktoru idi. Biz ona təklif edik ki, klub rəhbərliyinə gəlsin. Alınmadı. Ancaq bunları bir kənara qoysaq, hər şeydən əvvəl Qurban Qurbanovun çox gözəl xarakteri var. Hətta biz o zaman bir-birimizə “Kurtlar Vadisi”nin obrazları olan “Polad” və “Çakır” deyə səslənirdik. Hansımızın “Çakır”, hansımızın “Polad” olduğunu özündən soruşsaz, daha yaxşı olar (gülür). Belə şirin münasibətimiz var idi. Onun ailəsində də olmuşam. Zaqatalada rəhmətlik anası bizə dadlı pirojkilər, yeməklər, Zaqatala qutabı hazırlayardı. Allah rəhmət eləsin”.
Alıyev sözlərinə belə davam etdi:
“O vaxt Cahangir müəllimlə danışarkən təklif etdik ki, Qurban Qurbanov “İnter”in baş məşqçisi olsun. Kaş olaydı. İndi “Qarabağ”da göstərdiyi nəticənin yarısını “İnter”də göstərsəydi, şəxsən mən klubun direktoru kimi “Şəfa” stdionunda (ASK Arena) onun heykəlini ucaladardım. Amma Cahangir bəy razılaşmadı. Bunların hamısı pərdəarxası söhbətlərdi”.
Alı Alıyevlə geniş müsahibə ilə qəzetimizin sabahkı sayında tanış ola bilərsiz.
SƏNƏM FƏRHADOVA
Digər xəbərlər
