Adını Azərbaycan futbol tarixinə qızıl hərflərlə yazan, ardıcıl qələbələrlə futbolsevərləri ümidləndirən Qurban Qurbanovun dünən 50 yaşı tamam oldu.

Ona bundan sonra da cansağlığı və uzun ömür arzulayırıq. Qəzetimizin ötən sayında təcrübəli mütəxəssislə geniş müsahibə dərc olundu. Qurban bəy özünün insan, şəxsiyyət və futbolçu kimi formalaşmasında əsas pay sahiblərindən biri kimi Şaban Şirdanovun da adını çəkdi. Qardaşı Musa Qurbanov kimi, müəlliminin də əməyini heç vaxt itirməyəcəyini dedi. Görəsən, Şirdanov yubilyar yetirməsini təbrik edib? Bu və bizi maraqlandıran başqa suallara cavab tapmaq üçün qocaman mütəxəssislə danışdıq.

- Yetirməniz Qurban Qurbanovun 50 yaşı tamam oldu. Onu yubileyi münasibəti ilə təbrik edib, ürək sözlərinizi çatdırmısız?
- Mesaj vasitəsi ilə təbrik etmişəm. Amma yəqin ki, əlaqə saxlayacağıq.

- Qurban bəyin bu qədər uğurlu olacağına inanırdız?
- O, daim mübarizə aparan, oyunu buraxmayan bir xarakterə mailk idi. Performansı, fərdi ustalıq keyfiyyətləri də yüksək idi. Buna görə də inanırdıq ki, gələcəyi çox parlaq olacaq. Elə də oldu.

- Hazırda Zaqatala futbolunda Qurban Qurbanovun davamçısı olacaq, onun yolu ilə gedəcək biri var?
- O vaxt Qurban Qurbanovun çoxlu uğurlar qazanacağını bilirdik. Amma bu səviyyəyə qədər gələcəyini heç kim təxmin edə bilməzdi. Ona görə bu suala cavab vermək çətindi. Zaqatalada potensiallı gənclər çoxdu. Üzərlərində də çalışırlar. Lakin hazırda elə biri yoxdu.

- Qurban bəyin oğlu Musa haqda nə deyə bilərsiz?
- Musa Qurbanlının oyununu izləyirəm və bəyənirəm. Ölkə futbolunda problemlərimiz həddən artıqdı. Onlardan biri də hücumçu mövqeyidi. Lakin burda Musanın perspektivli olacağını görürəm. Üzərində çalışır. Bunun üçün əlverişli şərait də var. Gələcəkdə daha da inkişaf edib güclü futbolçu kimi formalaşa bilər.

- Musadan söz düşmüşkən, bəzilərinin fikrincə, o, Qurban Qurbanovun oğlu olmasaydı, hazırda “Qarabağ”ın əsas hücumçusu idi. Yəni atasının bir növ onun qarşısını kəsdiyini deyirlər. Siz bu barədə nə düşünürsüz?
- Qurban Qurbanovun xarakterinə bələdəm. Kiminsə haqqına girməyi xoşlayan biri deyil. Öz oğlu olsa belə. Bu baxımdan düşünmürəm ki, Musa meydana çıxmağı haqq edirsə, o kənarda qoysun. Bəlkə də eyni mövqedə iki eyni səviyyəli futbolçusu var. Bu üzdən digərinə üstünlük verir. Amma Musa daha üstündüsə, Qurban Qurbanovun onu meydana buraxmasında problem görmürəm.

- Premyer-liqaya növbəti mövsüm birinci diviziondan iki klubun gələcəyi böyük ölçüdə dəqiqləşib. Bunlardan biri “Kəpəz”, digəri isə “Turan Tovuz”du. “Zaqatala”nın kənarda qalması sizə necə təsir edir?
- Bilirsiz ki, 1-ci divizionda idman prinsipləri işləmir. Bunun da bəzi səbəbləri var. Ancaq düşünmürəm ki, “Zaqatala” “Turan Tovuz” və “Kəpəz”dən daha az haqq edir. Təbii ki, onların da premyer-liqaya yüksəlməsinə sevinirəm və bunu məqsədəuyğun sayıram. Amma haqq-ədalətə qalanda, bu gün premyer-liqada və eləcə də digər liqalarda Zaqatalanın daha çox təmsilçisi çıxış edir. Premyer-liqada 12 klubun olmasını daha məqsədəuyğun hesab edirəm. Əvvəl bu sistem özünü doğruldurdu. Ölkə futboluna verdiyi töhfələrə görə düşünürəm ki, “Zaqatala”nın haqqı heç bir klubdan az deyil. İnfrastruktur və şərait baxımından da klub yaxşı vəziyyətdədi. Buna görə də “Zaqatala”nı premyer-liqada görmək istəyərdim.

SƏNƏM FƏRHADOVA