“Bu haqda sizə danışmışdım. Yunanıstan klubu Turana nə maaş verirdi, nə də normal müalicə edirdi. Bu səbəbdən də futbolçu vətənə qayıdıb. Müqaviləsinə xitam verilməsi üçün də Volos təmsilçisinə müraciət etmişik. Turan indi Bakıda müalicə olunur. Dünən vətənə qayıdanda onu həkimə yönəltdik, MRT etdirməlidi. Bəzi prosedurlardan keçəndən sonra vəziyyəti bilinəcək. İki aydan çoxdu beli ağrıyır. Bu müddət ərzində heç nə etməyiblər. Sağalmasını gözləyirik, ondan sonra bizdə məşqlərə başlayacaq. Bilirsiz ki, icarəyə verdiyimiz üçün bu mövsüm komandamıza kömək edə bilməz. Düzdü, bizim futbolçumuzdu. Onun problemlərini həll etməyə çalışırıq. Məsələ ilə bağlı “Olimpiakos”a rəsmi məktub yollamışıq. Bu gün cavab gəlməsə, sabah FİFA-ya da şikayət edəcəm. Mövsümün bitməsinə hələ vaxt var. Əvvəlcə bilək ki, onun zədəsi necədi. Ondan sonra oturub danışacağıq. Amma unutmaq olmaz ki, Turanın bizimlə hələ birillik müqaviləsi var. İndidən harasa göndərilməsi ilə bağlı nəsə demək olmaz. Bu əsasən baş məşqçidən asılı olacaq. Aftandil Hacıyev desə ki, Turan bizə lazım olan futbolçudu, onu saxlamağa çalışacağıq. Yəni bu məsələdə birbaşa məsuliyyət baş məşqçimizdədi. Düzdü, “Olimpiakos”a gedəndə buna mane olmağa çalışdıq. Çünki 3-4 azərbaycanlı futbolçu ora gedib, narazı qayıdıb. Bu məsləhətləri Turana vermişdik. Lakin həvəsli idi. Gəncdi, istəyirdi ki, özünü göstərsin. Amma heyf ki, belə alındı. Yəqin indi səhvini başa düşüb. Bəlkə də normal Avropa ölkələrindən maraq olsa, bir şey düşünmək olar. Amma yekun qərarı Aftandil bəy verəcək”.