PFL klubları buna məcbur etməyəcək - ÖZƏL AÇIQLAMA
Martın 29-da PFL-in rəsmi saytı belə bir informasiyanı ictimaiyyətlə bölüşdü: “Ölkədə epidemioloji vəziyyətin yaxşılaşması, xüsusi karantin rejimi çərçivəsində yumşalma tədbirlərinin növbəti mərhələsinin tətbiqi ilə bağlı Nazirlər Kabineti yanında Operativ Qərargahın son qərarlarını nəzərə alan PFL azarkeş limiti ilə bağlı dəyişiklik edib. Ümumi məsləhətləşmələrdən sonra 30 mart, 1 apreldə keçiriləcək birinci divizionun 19-cu və 2-3 aprel tarixlərində baş tutacaq premyer-liqanın 21-ci turunun oyunlarından etibarən stadionlarda azarkeş tutumunun 100 faiz olmasına icazə verilib. Eyni zamanda, jurnalistlərin fəaliyyətinin yaxşılaşdırılması üçün “miks-zona”ların təşkili (qapalı məkanda olacaqsa, qoruyucu maskalardan istifadə olunmaq şərti ilə) bərpa olunacaq”.
Qurumun açıqladığı birinci məsələ ilə bağlı hansısa problem olmadı. Bileti olanlar sərbəst şəkildə tribunalarda yer aldılar. Problem jurnalistlərin işi ilə bağlıdı. Qarşılaşmalardan sonra futbolçulardan açıqlama, müsahibə almaq istəsək də, arzumuz bir çox hallarda ürəyimizdə qaldı. Yalnız “Qarabağ” - “Səbail” matçından sonra Ağdam təmsilçisinin mətbuat katibi Gündüz Abbaszadənin təşəbbüsü ilə Leandro Andradedən müsahibə götürə bildik. Qonaq komandanın futbolçularından isə heç kim danışmadı. Ümumiyyətlə, bu məsələdə boşluqlar var. “Miks-zona”da ancaq meydan sahiblərinin üzvlərini danışdırmaq olar? Qonaqlar üçün bu qayda keçərli deyil? Mətbuat katibləri hər oyunda ən azı bir futbolçunu media qarşısına çıxarmağa məcburdu, ya yox? Suallarımızı premyer-liqa matçlarını təşkil edən PFL-in mətbuat katibi Aslan Şahgəldiyevə ünvanladıq:
“Bildiyiniz kimi, pandemiya dönəmində, ümumiyyətlə, “miks-zona” ləğv olunmuşdu. Futbolçulardan açıqlama almaq mümkün deyildi. Sonra həm jurnalistlər, həm də klub nümayəndələri ilə müzakirələr apardıq. Onlar bildirdilər ki, oyunçulardan açıqlama, müsahibə almaqda problem var. Bu səbəbdən də baş məşqçilərin mətbuat konfransı bitəndən sonra hər komandanın bir üzvünün media mənsublarının suallarını cavablamasına qərar verdik. Bu həm jurnalistlərin işinin yaxşılaşdırılması, həm də “miks-zona”nın əvəz olunması üçün idi. Artıq respublikamızda pandemiya ilə bağlı vəziyyət düzəlib. Bu səbəbdən də stadionlara 50 yox, 100 faiz azarkeş gələ bilər. “Miks-zona”lar da bərpa olunub. Bura həm ev, həm də qonaq komandanın futbolçuları gəlməlidi. Amma bu məcburi deyil. Sadəcə, jurnalistlərlə klubun mətbuat xidməti bir yerdə çalışmalıdı. Matçlardan sonra klubun media işlərinə cavabdeh olan şəxsi qələm əhlinin istədiyi futbolçunu “miks-zona”ya dəvət etməlidi”.
İLKİN SULTANLI
Digər xəbərlər
