“Formula-1” komandalarından “Haas”ın rəhbəri Günter Ştayner Ciddə mərhələsində yaşananlar, Şumaherin yaşadığı qəza və bir çox başqa məsələlələr ilə bağlı sualları cavablayıb.

- Komandanız ardıcıl 2-ci mərhələdə xal qazandı. Hərçənd Mik Şumaherin şənbə günü baş verən qəzada xəsarət almaması bundan daha vacibdi.

- Bəhreyn mərhələsindən sonra əmin idim ki, yaxşı maşınımız var, Ciddədə biz bunu bir daha təsdiqlədik. Əlbəttə, nəticə mövsümün ilk mərhələsindəki qədər yaxşı deyil. Ancaq Mikin sağlıq durumu həqiqətən daha vacibdi. Kevin Maqnussen 10-cu mövqedən start götürdü, alternativ taktika seçdik. Təhlükəsizlik maşını bizim üçün olduqca qeyri-münasib vaxtda trassa daxil oldu. Sonradan bir neçə pilotun mübarizədən çəkilməsi ilə bəxt üzümüzə güldü.

- Kevinin finişdən sonrakı durumu ilə bağlı nə demək olar? O hələ şənbə günü – təsnifatdan sonra boynundakı problemlərdən gileylənirdi, amma 50 dövrənin ağırlığına davam gətirdi.

- Hə, həqiqətən güclü ağrılar hiss edirdi, mən hətta ona “zəif boyunlu vikinq” dedim. Ancaq Ciddə trassı spesifik özəlliklərə malikdi, sürətli döngələrin sayı çoxdu, Kevin isə bir il ərzində “Formula-1” maşınlarını sürməyib. Belə trass pilotdan çox yaxşı fiziki hazırlıq tələb edir.

- Şumaher mövzusuna qayıdaq. Onun elə həmin gün hospitaldan çıxması qeyri-adi məqamdı, nə beyin silkələnməsi əlamətləri var idi, nə də sağlıq durumu ilə bağlı hansısa başqa problem...

- Hə, qəribə tarixçədi. Ancaq pilotlar daim məşq edən adamlardı, müasir maşınlar isə çox təhlükəsiz və möhkəmdi. Bundan başqa, Mikin bəxti onda gətirib ki, yan zərbələrin gücünü azaldan bütün təhlükəsizlik strukturları ideal işləyib. Şassinin sıradan çıxmamasına görə də sevinirəm. Maşının bütün qalan hissələrı qırılıb, amma şassi yox.

- Demək istəyirsiz ki, növbəti yarışlarda da bu şassidən yararlanacaqsız?

- Tam doğrudu. Yan təhlükəsizlik strukturlarını dəyişmək zəruridi, necə lazımdı işləyiblər və dağılıblar. Qalan bütün hissələri isə xüsusi çətinlik olmadan düzəltmək olar.

- Belə yüksək səviyyədə nə qədər uzun müddət çıxış edə biləcəyinizlə bağlı gözləntilərinizi də bölüşün. Tribunaların reaksiyasına baxsaq, azarkeşlər uğurlarınıza görə sevinirlər. Ancaq realist olaq: “Haas”dan bu mövsüm nə gözləmək olar?

- İndi mən də sizə sual vermək istəyirəm: bu uğurlar seriyası niyə dayanmalıdı ki? Niyə belə düşünürsüz ki, biz bu səviyyədə davam gətirə bilməyəcəyik?

- “Ferrari”, “Red Bull”, “Mersedes” və başqa komandaların resurslarına baxaq – onlarla rəqabət apara bilərsizmi?

- Hələ ki “Ferrari” və ya “Red Bull” ilə rəqabət aparmırıq. Ancaq hesab edirəm ki, bundan sonra da ilk iki mərhələdəki kimi nəticələr göstərə bilərik. Aydın məsələdi ki, rəqiblər bizə çatacaq. Bütün komandaların büdcə məhdudiyyəti ilə üzləşdiyini də unutmayaq. İndiki vəziyyət baxaq. Top-komandalar texnikanın modernləşməsinə əvvəllər olduğu kimi, yəni istədiyi qədər pul xərcləyə bilməyəcək. Biz də maşın üzərində işləyəcək, daha yaxşı çıxış etməyə çalışacağıq. Proqnoz verməkdən çəkinirəm, ancaq indi bütün komandalar aşağı-yuxarı eyni şəraitdə yarışırlar. Məhz buna görə mövcud maliyyə reqlamenti bizim üçün sərfəlidi. “Formula-1” yetərincə maraqlı oldu, axı böyük olmayan komandalar da pelotonun ortasında yer uğrunda mübarizə apara, hər həftəsonu xala iddia edə bilirlər. Düşünürəm ki, büdcə məhdudiyyətinə keçidin mənası da bu idi: “Formula-1”də rəqabət səviyyəsi yetərincə artıb