Dünən premyer-liqanın 21-ci turu çərçivəsində keçirilən “Sumqayıt” – “Sabah” matçında meydan sahibləri 0:3 hesabı ilə yenilməklə mövsümdə 12-ci dəfə meydanı məyus tərk etdilər.

Sonuncu dəfə ötən ilin oktyabrın 31-də “Səbail” üzrəində qələbəyə sevinən “kimyaçılar” təxminən 6 aydı 3 xal üzünə həsrətdi. Bu 6 ayda Ayxan Abbasov baş məşqçi postundan ayrılıb, belaruslu Aleksey Baqa texniki zonada onu əvəz edib. Ancaq bu dəyişiklik də “gənclik şəhəri”nin təmsilçisini xeyir gətirməyib. Sumqayıtlıların uğursuz çıxışı şərtləndirən səbəblər barədə uzun-uzadı yazmaq və fikir bildirmək olar. Ancaq bu dəfə sonuncu “Sabah”la matçada yaşananlara toxunmaq istyirəm.

Qarşılaşma başa çatandan sonra çoxları böyükhesablı yenilgiyə görə, dünənki oyunda debüt edən Andrey Popoviçi “qurbanlıq qoyun” seçdi. Guya, “tələbələr”lə görüşdə “çərçivə”də Andrey yox, Aydın Bayramov və ya Tərlan Əhmədli olsaydı, “kimyaçılar” Murad Musayevin komandasının daşını daş üstə qoymayacaqdı, tribunaya toplaşan azarkeşləri vurduğu qollarla sevinc yaşlarında boğacaqdı. Yox, əzizlərim “Sumqayıt”ın dərdi Popoviç deyil. Andreyin buraxılan qolların heç birində səhvi yox idi. Aleksey Baqanın təbirincə desək, hər üç qol “böyük futbol”dan fraqmentlər idi. Aydın və Tərlan heç də pis qapıçılar deyillər. Ancaq hər ikisi son zamanlar inamsız təsir bağışlayırlar. İki eyni səviyyəli qolkiper rəqabətsizlik durumunda arxayınlaşıblar, meydanda olduqları oyunlarda ciddi səhvlərlə yadda qalıblar. Uzağa getməyib premyer-liqanın 20-ci turunda “Bakcell Arena”da keçirilən oyunu yada salaq. 82-ci dəqiqə, hesab 1:1. Meydan sahibləri heç nədən penalti vurmaq hüquq qazandılar. Aydın düz yerdə Ramon Maçadonu yerə sərməklə meydan sahiblərinin ikinci qolu vurmasına şərait yaratdı. Bir qədər əvvələ qayıdaraq. elə “Sabah”la ikinci dövrədəki oyunu xatırlayaq. Məhz Bayramovun qapı qarşısında “hədiyyəsi” “tələbələr”in qolu ilə nəticələndi. Odu ki, Aydınla Tərlan səhvi özündə axtarıb, özlərinə “niyə “milləşdirilən” qolkiper 10 ildən sonra “Sumqayıt”a qayıdıb əsas heyətdə yer alır” sualını versinlər. Bəziləri iddia edir ki, Popoviç Aydının milliyə yolunu bağlayır. Yenə sizinlə razılaşmıram. Aranızda kim Bayramovun sonuncu dəfə milliyə dəvət olunduğu tarixi xatırlayır? Ancaq xahiş edirəm internetə axtarış verməyin. Komandanın daxilindən xəbəri olmayanlar sosial şəbəkələrdə “Andrey dünən gəldi, bu gün əsas heyətdə yer aldı” kimi qeydlər edirlər. Ancaq bu belə deyil. Popoviç artıq 3 həftədən çoxdu ki, “Sumqayıt”ın düşərgəsində məşq edir. Bu isə heç də az müddət deyil. Onu da nəzərə alın ki, qolkiper Sumqayıta Antalyadan, yəni, sabiq klubu LNZ-nin təlim-məşq toplanışından gəlib. Bu isə o deməkdi ki, hazırlıq baxımından problemi olmayıb. Bütün bunları ona görə qeyd edirəm ki, “Sumqayıt”ın “Sabah”a yenilgisinin günahkarı qapıçı yox, meydan oyunçularıdı. O futbolçular ki, ötən mövsüm “bürünc” qazanandan sonra özlərini “ulduz” hesab etməyə başlayıblar. Mövsümlərarası fasilədə maaşları yetərincə yüksələn əlilər, rəhimlər camaləddinlər, muradlar artıq fikirlərini məşqlərə və oyunlara yox, gecə klublarına yönəldiblər. Gecə əyləncələrinin sonu isə belə də olmalıdı. Nə özlərində, nə də ümumi komandada ruh qalıb...

RƏŞAD