“Qəbələ”nin oyununa kölgə salmaq istəmirəm, amma mən gördüyümü deyirəm" - Sənan Qurbanov
Premyer Liqanın 21-ci turu çərçivəsində “Qəbələ” “Keşlə”ni sınağa çəkib.
"Football-plus.az" saytının məlumatına görə, matç 1:1 hesablı bərabərliklə yekunlaşıb.
Oyundan sonra baş tutan mətbuat konfransında qonaq komandanın baş məşqçisi Sənan Qurbanov qarşılaşma haqda fikirlərini bildirib:“Bilirdik ki, “Qəbələ”yə qarşı səfərdə oynamaq həmişə çətin olur. Yaxşı hazırlaşmışdıq. Son turlarda məğlub olsalar da, yaxşı futbol oynayırlar. Oynadıqları futbol göz qabağındadı. Burada məğlub olmaq istəmirdik. İlk hissəni bizim aktivimizə yazmaq olar. Oyun başlayandan diqtə edən tərəf biz idik. Qolumuzu da vurduq. Fasilədə paltardəyişmə otağında futbolçulara konsentrasiya haqda çox danışdım. Amma təəssüflər olsun ki, fasilədən sonra ilk dəqiqələrdə qol buraxdıq. 40 dəqiqədən çox azlıqda oynadıq. Futbolçular əziyyət çəkdilər, çox çətin idi. Səfərdə bir xal qazandıq. Növbəti matçlara hazırlaşacağıq".
Qurbanov, oyunun idarəçiliyi barədə də fikirlərini bildirib:
"Gənc hakim idi. Biz də istəyirik ki, onlar inkişaf etsin. Amma cərimələr, kartlar hamısı bizim əlehimizə idi. Qırmızı vərəqə verilən epizoda baxmaq lazımdı. “Qəbələ”nin oyununa kölgə salmaq istəmirəm, amma mən gördüyümü deyirəm. Hər xırda foullar bizi aqressivləşdirdi. Əgər qırmızı vərəqə yox idisə, demək ki, bu, oyuna təsir etdi"."Bilirik ki, heç bir komanda aşağı liqaya yuvarlanmayacaq. Amma sonuncu pilləni tutmaq istəmirik. Məğlub olmaq istəmirik. Futbolçulara bunu aşılamaq niyyətindəyəm. Başqa komandaların bizə potensial 3 xal kimi baxmaqları adama təsir edir. Futbolçulara da bunu aşılayıram ki, heç kim bizə 3 xal gözü ilə baxa bilməz. Mübarizə aparmalıyıq" - deyə, Sənan Qurbanov fikirlərini yekunlaşdırıb".
