“Milliləşdirilənlər” ilə də uduzuruqsa, imkan ver, yerlilər oynasın" - Menecer
“Həm Maltaya, həm də Latviyaya məğlubiyyətin məsuliyyəti birmənalı şəkildə Canni de Byazinin üzərindədi. İtaliyalı mütəxəssis Millətlər Liqası ərəfəsində sonuncu toplanışda bəzi eksperimentlərə getdi, bu da özünü doğrultmadı. Bu gün Malta ilə Latviyanı yenə bilməyən komanda Millətlər Liqasında Slovakiya, Belarus və Qazaxıstan qarşısında nə edəcək?"
Bu sözləri "Futbol+" qəzetinə açıqlamasında tanınmış agent Vaqif Heydərli deyib. Menecer millinin heyətinə çağrılan futbolçulardan narazılığını dilə gətirib:
"Riçard Almeydanı, Filip Ozobiçi, Dmitri Nazarovu bu yaşda yığmaya çağırmağın nə mənası var? Toplanışdan əvvəl baş məşqçi təcrübəlilərsiz millinin nəticə qazanmasının çətin olacağını bildirmişdi. Nəticə oldu? Ondansa, adını çəkdiyim futbolçuların əvəzinə yerliləri dəvət etmək olardı. Demirəm ki, Rövlan Muradov, İsmayıl İbrahimli və ya Vüqar Mustafayev olsaydı, komanda daha yaxşı təsir bağışlayardı, qələbə qazanardı. Ancaq “milliləşdirilənlər” ilə də uduzuqsa, imkan ver, yerlilər oynasın. Rövlanın, İsmayılın 24 yaşı var. Bu gün onlar yığmaya dəvət almırlarsa, nə vaxt bu imkanı qazanacaqlar? Ümumilikdə futbolumuzun problemlərinin kökü çox dərinə gedir. Bu haqda saatlarla danışmaq olar. Ancaq qısa zamanda uğur qazanmaq istəyirsənsə, bu toplanışdan daha yaxşı faydalanmaq olardı. Yeri gəlmişkən, onu da qeyd edim ki, meydana çıxan futbolçuların potensialı daha artığına imkan verirdi”.
Digər xəbərlər
