Yığma bu gün 2022-ci ildə ilk görüşünü keçirəcək - Maltada yerli komanda ilə qarşılaşacaq.

Martın 29-da isə Latviya ilə oynayacağıq. Canni de Byazinin bu matçlar üçün dəvət etdiyi futbolçular neçə gündü müzakirə mövzusudu. Bir çoxları siyahıda “Qəbələ”nin üzvlərinin azlığından şikayətçidi. 4-cü pillədə qərarlaşan komandadan yalnız Nicat Mehbalıyev Maltaya aparılıb. Əminliklə demək olar ki, Şahruddin Məhəmmədəliyevlə Emil Balayev zədəli olmasaydı, o da çağrılmayacaqdı. Halbuki Rövlan Muradov, Murad Musayev kimi futbolçulara yoxlama matçlarında şans vermək olardı. De Byazi “Qəbələ”nin üzvləri ilə bağlı suala qaneedici cavab verməyib. Bölgə klubunun baş məşqçisi Elmar Baxşıyev isə “Futbol+”ə açıqlamasında baş məşqçinin seçimini şərh etməyərək, futbolçularına daha çox çalışmağı məsləhət gördü. Bu səbəbdən də “qırmızı-qaralar”ın kapitanı Asif Məmmədovla əlaqə saxladıq.

- Yenə “Qəbələ”nin heyətindən, demək olar ki, heç kim yığmaya dəvət olunmayıb. Şahruddinlə Emin zəli olmasaydı, Nicat da millidən kənarda qalacaqdı. Komandanın kapitanı kimi bu seçimi necə dəyərləndirirsən?

- Əvvəlcə milli komandaya uğurlar arzulayıram. Ümid edirəm ki, yaxşı nəticə əldə edəcək. Baş məşqçinin qarşısına konkret hədəflər qoyulub. O da bu səbəbdən daha təcrübəli futbolçuları yığmaya dəvət edib. Onun seçimini anlamaq olar. Lakin bunlar yoxlama görüşləridi, gənc futbolçuları sınamaq olardı. Düşünürəm ki, bizim komandadan Rövlan Muradovla Murad Musayev yığmaya layiq idi. Onları belə matçlarda sınamaq olardı. Məqsəd İsayev də xeyir verə bilərdi. Premyer-liqada yaxşı oynayırıq, özümüzü yaxşı tərəfdən göstəririk deyə, belə demirəm. Sadəcə, ən azı Rövlan kimi gənc futbolçuları belə məqamlarda sınamaq mümkün idi. Muradın sənədində hansısa problem olub, bunu başa düşdük. Urfan Abbasov da zədədən yeni qayıdıb. Hardasa bu seçimi də anlamaq olar. Amma Rövlanla bağlı hər şey qaydasında idi. Ona belə matçlarda şans verib, gələcək üçün qazanmaq olardı. Milli komandanın heyətində futbolçular ikiqat motivasiya ilə mübarizə aparır. Gəncləri belə matçlarda yoxlayıb, potensialına daha çox bələd olmaq mümkündü.

- Deyirsən ki, Urfan Abbasov zədədən yeni qayıdıb. Axı son turda bir neçə dəqiqə oynayan Bədavi Hüseynov da yığmaya çağrılıb. Halbuki Urfan artıq 3 oyundu komandasına kömək olur. Onun yox, Bədəvinin yığmaya dəvət almasının səbəbi nədi?

- Vallah, mənə də maraqlıdı. Bədavi dostumdu, onunla əla münasibətimiz var, bir-birimizə hörmət edirik. Bunlar öz yerində. Amma belə bir şey də var. Bədavi uzun illər millidə yaxşı çıxış edən futbolçulardan olub. Vacib görüşlərdə meydana çıxıb. Ola bilər ki, baş məşqçi onun yoxluğunu hiss edib. Bəzən zədədən yeni qayıdan futbolçuları yenidən qazanmaq üçün dəvət edirlər. Yığmanın görüşlərinin vacibliyini oyunçu hiss edib, psixoloji cəhətdən toparlanır. Yəqin Canni de Byazi də bunu düşünüb. Yoxlama görüşlərində şans verməklə Bədavini psixoloji cəhətdən qazanamaq istəyir. Yoldaşlıq oyunları məhz belə problemləri aradan qaldırmaq üçündü. Mən şəxsən belə düşünürəm. Bundan başqa, Bədavi milli üçün hazırda faydalı olacaq futbolçulardandı. Onun yoxluğu həqiqətən hiss olunur.

- Milliyə gənclərin dəvət almasının daha yaxşı olacağını söylədin. Amma Riçard Almeyda, Dmitri Nazarov kimi yaşlı futbolçular da çağrılıb. Sən də, demək olar ki, onlarla eyni nəslin nümayəndəsisən, hazırda çempionatda 4-cü pillədə qərarlaşan “Qəbələ”nin kapitanısan, bu mövsüm də yetərincə yaxşı oyun sərgiləmisən. De Byazi təcrübəndən yararlana bilməzdi?

- Məni yığmaya çağırsaydılar da, qəbul etməzdim. Təkliflərinə görə təşəkkür edib, başqa oyunçunu dəvət etmələrini istərdim. Çünki artıq yaşım keçib. Milliyə o qədər də fayda verə bilmərəm. Yenə deyirəm, yığmaya gənc futbolçular çağrılmalıdı. Əslində qayda başqadı. Bir nəsil nəticə verə bilmirsə, onu əvəz etmək lazımdı. Əvvəlkilər Millətlər Liqasında, dünya çempionatının seçmə mərhələsində nəticə qazana bilmədilər. Demirəm ki, bütün futbolçuları, ümumiyyətlə, çağırmamaq lazımdı. Yaşlaşmış, yığmaya faydası olmayanların yerinə gənclər gəlməlidi. U-21-də nə qədər istedadlı futbolçu var. Onlardan yararlanmaq olar. Təcrübəni Malta, Latviya kimi ölkələrlə oyunlarda yığacaqlar. Elə U-19-dan da uşaqları cəlb etmək olar. Onlar məsuliyyəti başa düşməlidi. İndi oynamasalar, həyəcanı üzərlərindən atmasalar, rəsmi matçlarda özlərini necə göstərəcəklər? Həqiqətən Azərbaycanda gənc, istedadlı futbolçular var. Nəticəni düşünməyib onları inkişaf etdirsək, gələcəyimiz yaxşı ola bilər. Bu səbəbdən də milliyə məni dəvət etsəydilər, qəbul etməzdim ki, cavanların yolu açılsın.

- Səncə, millimiz Malta və Latviya ilə oyunlarda qələbə qazana biləcək?

- Bu onların vəzifə borcudu. Malta və Latviyanı uda bilməsək, kimə qalib gələcəyik?! Düzdü, futbol qəribəliklərlə doludu. Hər an hər şey baş verə bilər. Amma müqayisə edəndə Azərbaycan futbolu Malta və Latviyadan qat-qat üstündü. Klublarımız illərdi avrokubokların qrup mərhələsində çıxış edir. Çempionatımızda komanda sayı az olsa da, onlarınkından daha səviyyəlidi. Ölkə xaricində, güclü liqalarda çıxış edən futbolçularımız var. Malta və Latviya millilərinin heyətində o qədər də güclü oyunçular yoxdu. Bunların hamısını nəzərə alanda yığmamızın onları rahat məğlub edəcəyini düşünürəm. De Byazi də həqiqətən yaxşı futbolçular dəvət edib. Hazırkı millinin heyətinə baxanda kifayət qədər təcrübəli və istedadlı oyunçuların olduğunu görürük. Bu səbəbdən də hazırlıq xarakterli yoldaşlıq oyunları olsa da, qələbə qazanmalı olduğumuzu düşünürəm. Yəqin De Byazi də Millətlər Liqasından öncə qələbələrin komandaya motivasiya verəcəyini düşünüb, futbolçulardan hər iki oyunda qalib gəlmələrini tələb edəcək.

- AFFA rəhbərliyinin Canni de Byazinin qarşısına konkret tələb qoyduğunu dedin. Yəqin hədəf Millətlər Liqasında uğur qazanmaqdı. Yığma bu turnirdə növbəti mərhələyə vəsiqə qazana biləcək?

- Bəli, düşünürəm ki, bu dəfə nəsə alınacaq. Çünki baş məşqçi yoxlama oyunlarına təcrübəli futbolçuları dəvət edir. Bu da sırf nəticəyə köklənən strategiyadı. İndidən özü üçün komanda formalaşdırır. Əlində olan bütün təcrübəlilərdən istifadə edərək Millət Liqasında birinci pilləni tutmaq istəyir. Fikrimcə, futbolçular özlərinə inansalar, bunu bacaracaqlar.

- Slovakiya kimi komandanın olduğu qrupu lider bitərə bilərik?

- Çətindi, amma mümkünsüz deyil. Mən də rəqiblərin gücünü bilirəm. Amma nəsə ürəyimdə bir hiss var ki, bacaracaqlar. Yüz faiz əmin deyiləm. Amma bunun üçün hər cür şərait var. Yenə deyirəm, futbolçular da yetərincə təcrübəlidi. Əksəriyyəti avrokuboklarda, xarici klublarda çıxış edir. Əmin olmasam da, qəlbimdə yığmamızın bu dəfə bacaracağını düşünürəm.

İLKİN SULTANLI