"Canni de Byazi milliyə dəvət etdiyi futbolçulardan vahid ansambl formalaşdıra bilmədi" - Tanınmış jurnalist
“Ağır dərddi. Reytinqdə - nəzəri, futbolun inkişafında - yəni praktiki, bizdən üstün olan ölkələrin millilərinə məğlub olanda soyuq başla təhlil edib deyirik ki, zəifik. Ancaq Malta və Latviya yuxarıdakı sıralamaya daxil deyil axı! Maltayla görüşdə, ümumiyyətlə, futbol yox idi. Biz "ikinci nömrə" oynayırdıq, ay qardaş..."
Bu sözləri "Futbol+" qəzetinə açıqlamasında tanınmış jurnalist Ceyhun Əliyev deyib. "Sport24.az" saytının baş redaktoru yığmanın son yoxlama görüşlərindəki nəticələrinə görə, Canni de Byazinin günahkar hesab edib:
"Maraqlıdı ki, həmin məğlubiyyəti şərh edən millinin kapitanı Maksim Medvedev bu sistemdə (4-lü müdafiə) özlərini narahat hiss etdiklərini dilə gətirdi. Hərçənd bu, şərəfini qoruduğu “Qarabağ”ın 10 ildən çoxdu oynadığı üslubdu. Maksimdən söz düşmüşkən, bir əlavəni də edim ki, 33 yaşlı kapitan jurnalist və azarkeş təzyiqindən gileylənib. Məhz bu amili Maltaya məğlubiyyətdə əsas görüb. Kapitanın yaşını əbəs yerə qabartmadım. Özü də nəzərə alaq ki, Azərbaycanda, ümumiyyətlə, təzyiq yoxdu. Maksimin sabiq komanda yoldaşı Mahir Emreli ilk yüngülvari təzyiq görən kimi Polşadan baş götürüb getdi. Hər halda, Medvedev hansı təzyiqi nəzərdə tutduğumu başa düşər. Qısası, futbolçularımız milli komandanın məsuliyyətini hiss etmirlər! Bu, məsələnin bir tərəfi. İkinci tərəf isə məşqçi ilə bağlıdı. Canni de Byazi dəvət etdiyi futbolçulardan vahid ansambl formalaşdıra bilmədi. Zaman göstərir ki, italiyalı mütəxəssis qarşıdan gələn Millətlər Liqasında ortaya keyfiyyətli məhsul qoya bilməyəcək. “Qoy, elə öz məşqçilərimiz qazansın” absurd yanaşması ilə razı olmasam da, hesab edirəm ki, ölkə xaricinə boylanmaq üçün milli ən azı qrup üçüncülüyü uğrunda mübarizə aparmalıdı. Bax, onda əcnəbi mütəxəssislərin CV-lərinə baxmağa dəyər. Çünki hesab edirəm ki, belə keyfiyyətə sahib oyunçulardan fövqəl nəticə gözləməyə dəyməz. Ancaq bu, Millətlər Liqası matçları başa çatdıqdan sonranın mövzusudu. İnanmıram ki, iyunda start götürəcək turnir ərəfəsində baş məşqçi dəyişikliyi yaşansın. Həm də daxili bir hissiyyat mənə deyir ki, futbolçularla baş məşqçi arasında münasibətlər xoş deyil. Onsuz da zəifik, üstəlik, ab-hava da pis olanda lap bərbad duruma düşürük. Hesab edirəm ki, bu hissiyyat məni aldatmırsa, AFFA rəhbərliyi tərəfləri barışdırmalıdı. Hər halda, qarşıdakı 6 matç ölkənin imicidi və buna biganə qalmaq olmaz”.
Digər xəbərlər
