Vaqif Sadıqov: “Canni de Byazi cavab verəcək!” - ÖZƏL AÇIQLAMA
AFFA İcraiyyə Komitəsinin vitse-prezidenti Vaqif Sadıqov millinin baş məşqçisi Canni de Byazinin İtaliya mətbuatına müsahibəsində yığmanın üzvlərini qorxaq və xaraktersiz adlandırmasını şərh edib.
Qurum rəsmisi “Football-plus.az”a açıqlamasında italiyalı mütəxəssisin Bakıya qayıdandan sonra cavab verməli olacağını söyləyib:“De Byazi bilir ki, biz nə qədər güclü xalqıq. 1 il öncə bunu sübut etdik. 44 günlük Vətən müharibəsində mərdliklə, rəşadətlə mübarizə apardıq. Hesab edirəm ki, futbolçularımız da bu ruhda böyüyüb. Mən Canni de Byazinin əvəzinə cavab vermək fikrində deyiləm. Dəfələrlə şahidi olmuşam ki, İtaliyada olanda nəsə danışıb, Bakıya qayıdan kimi bunu təkzib edib. Həmişə günahı jurnalistlərin üstünə atmaqla kifayətlənib. Bakıya qayıdandan sonra bu açıqlamasına görə cavab verəcək! Amma deyə bilərəm ki, bizim futbol oynamaq bacarığımız var. Döyüşkən xalq olduğumuzu da sübut etmişik! Biz bu ruha sahibik və heç kim bunu əlimizdən ala bilməz!”
Vaqif Sadıqov De Byazinin bu sözlərinə görə millidən qovulmalı olub-olmadığı haqda da danışıb:“Mənim De Byazi ilə bağlı öz fikrim var. Həmişə İcraiyyə Komitəsinin iclasında bunu dilə gətirmişəm. Həmin fikirləri heç vaxt da ictimailəşdirməmişəm. Qısaca, mənim bu adamla bağlı öz düşüncəm var. Bunun da arxasında dayanacam. İlk növbədə bunu deyim ki, Canni de Byazi Bakıya gəlib, bu fikrinə görə hesabat verməlidi. Bu məsələnin nə qədər doğru olduğunu dəqiqləşdirməliyik. Amma heç vaxt kiməsə imkan vermərəm ki, futbolçularımızı, ümumiyyətlə, futbolumuzu aşağılasın!”
İLKİN SULTANLI
Digər xəbərlər
