Nurlan İbrahimov: “Bütün dünya bilir ki, mənə verilən cəza həqiqəti əks etdirmir” - AÇIQLAMA
Vətən müharibəsinin gedişində ermənilər Tərtəri, Tovuzu bombalayırdılar.
Övladlarımız dünyasını dəyişirdi. Bu, qətliam idi. Müharibə Qarabağda getsə də, mənfur düşmən şərəfsizlik edərək dinc əhalinin yaşadığı yerləri bombalayırdı. Həmin vaxt “Qarabağ”ın mətbuat xidmətinin rəhbəri əsəbi halda status yazaraq ermənilərin kökünün kəsilməli olduğunu bildirmişdi. Bu səbəbdən UEFA onu vəzifəsindən kənarlaşdırıb, futboldan ömürlük uzaqlaşdırdı. Artıq məsələnin üstündən 2 ilə yaxın müddət keçib. Nurlan İbrahimov İdman Arbitraj Məhkəməsinə müraciət edib. Dinləmə prosesi də olub. Amma dünən növbəti dəfə qərarın qəbulu təxirə salındı. Görəsən, səbəbkar İAM-ın bu addımı haqda nə düşünür? Nurlan bəy qələbə qazanacağına inanırmı? “Qarabağ”ın mətbuat xidmətinin sabiq rəhbərinin fikirləri belə oldu:
“Bəzi şeylər inamdan başlayır. İnanıram ki, hər ötən gün, qərarın yubanması bizim xeyrimizədi. Bunu təkrar etməkdən bezdim. Onsuz da bütün dünya bilir ki, mənə verilən cəza həqiqəti əks etdirmir. Həddən artıq şişirdilmiş qərardı. İdman Arbitaj Məhkəməsinin ədalətli qərar verəcəyinə inanırıq. Burda həm Fərid Haqverdiyev, həm də mən çox ağır proseslərdən keçmişik. Bunu çox adam bilmir. Bürokratik əngəllərə rəğmən, İAM-ın məhkəməsində iştirak edə bilmişik. Bu qədər problemləri həll etmişik. Buna görə də düşünürəm ki, əziyyətimiz hədər getməyəcək. Nəticə mənfi olsa da, üzülməyəcəm. Biləcəm ki, təslim olmadım, mübarizə apardım. İnşallah, xeyirlisi nədisə, o da olar. Hələ qarşıda 2 ay var. Yenə deyirəm, hər verilməyən neqativ qərar bizim xeyrimizədi. Məsələnin uzanması bizə verilən cəzasının real olmadığının göstəricisidi”.
İLKİN SULTANLI
Digər xəbərlər
